தென்னிந்திய படவுலகில் புதுப்பட வாய்ப்புகள் குறைந்த நிலையில், தற்போது பாலிவுட்டில் அதிக கவனம் செலுத்தி வரும் டாப்ஸி மும்பையில் வசிக்கிறார். தனது நீண்ட நாள் காதலர் பேட்மிண்டன் வீரர் மத்தியாஸ் போ என்பவரை திருமணம் செய்த அவர், தனது சகோதரி சகுன் பன்னுவுடன் சேர்ந்து புதிய வீடு ஒன்றை வாங்கியுள்ளார். அவர்கள் வாங்கியுள்ள அடுக்குமாடி குடியிருப்பின் கார்ப்பெட் பரப்பளவு 1,390 சதுர அடியாகவும், பில்ட்-அப் பரப்பளவு 1,669 சதுர அடியாகவும் இருக்கிறது. 2 கார்களுக்கான பார்க்கிங் விடப்பட்டுள்ளது. ரூ.4.33 கோடி மதிப்பு கொண்ட அந்த வீட்டை ரூ.21.65 லட்சம் கொடுத்து பத்திரப்பதிவு செய்துள்ளனர்.

கடந்த 15ம் தேதி நடந்த பத்திரப்பதிவின் போது, 30 ஆயிரம் ரூபாயை பதிவுக்கட்டணமாக செலுத்தியுள்ளனர். இந்த குடியிருப்பு மும்பையின் கோரேகான் பகுதியிலுள்ள இம்பீரியல் ஹைட்ஸில் அமைந்துள்ளது. இது அந்தேரி மற்றும் மாலாடு இடையே இருக்கிறது. மும்பையின் புறநகர் ரயில்வே நெட்வொர்க்குடன் இணைக்கப்பட்டுள்ள பகுதி என்பதால், இம்பீரியல் ஹைட்ஸில் பல தொழிலதிபர்கள் வீடு வாங்கியுள்ளனர்.

கடந்த 2024 ஏப்ரல் முதல் இந்த ஆண்டு மார்ச் வரை இப்பகுதியில் 47 சொத்துகள் விற்கப்பட்டு, மொத்தம் ரூ.168 கோடி பரிவர்த்தனை நடந்துள்ளதாக கூறப்படுகிறது. இந்தி படவுலகில் அதிக சம்பளம் வாங்கும் நடிகைகளில் ஒருவர் டாப்ஸி என்பதால், அவர் புது வீடு வாங்கிய விஷயம் அதிக கவனம் பெற்றுள்ளது.