2006 சட்டமன்ற தேர்தலில் மக்களுடனும், ஆண்டவனுடம் மட்டுமே கூட்டணி என்ற அறிவிப்போடு தனித்து களமிறங்கிய தேமுதிக நிறுவனர் விஜயகாந்த் கடலூர் மாவட்டத்தில் உள்ள விருத்தாசலம் தொகுதியில் போட்டியிட்டு வெற்றி வாகை சூடினார். அதில் அவரைத் தவிர மற்ற வேட்பாளர்கள் தோல்வியைத் தழுவினாலும் தேமுதிகவுக்கென ஒரு வாக்குவங்கியை உருவாக்கி காட்டினார். தமிழகத்தில் 234 தொகுதிகள் இருக்க விருத்தாசலம் தொகுதியை விஜயகாந்த் தேர்ந்தெடுக்க சில முக்கிய காரணங்கள் எடுத்து வைக்கப்பட்டன.
அந்த சமயத்தில் விருத்தாசலம் தொகுதி பாட்டாளி மக்கள் கட்சியின் கோட்டை என அக்கட்சியினரால் வர்ணிக்கப்பட்டது. விஜயகாந்த் கட்சி துவங்கியதும் விஜயகாந்தை சரமாரியாக விமர்சித்தார் பாமக நிறுவனர் ராமதாஸ். இதற்கு பதிலடி கொடுக்கும் விதமாக, உங்கள் கோட்டைக்கே வந்து உங்களை வென்று காட்டுகிறேன் என்று கூறி விஜயகாந்த் விருத்தாசலத்தை தேர்ந்தெடுத்ததாக சொல்வார்கள். இன்னொரு முக்கிய காரணமும் இருக்கிறது.
விஜயகாந்துக்கு அதிக ரசிகர்கள் நிறைந்த மாவட்டமாக கடலூர் விளங்கியது. அதிலும் குறிப்பாக கிராமப்புறங்கள் நிரம்பிய விருத்தாசலம் சுற்றுவட்டாரங்களில் அவருக்கு வெறித்தனமாக ரசிகர்கள் இருந்தனர். இதனால் அவர்களை நம்பி விஜயகாந்த் நம்பிக்கையுடன் களமிறங்கினார். இந்த இரண்டு காரணங்கள் மட்டுமில்லாமல் இன்னொரு காரணமும் சொல்லப்பட்டது. அதுதான் `வி’ சென்டிமென்ட்.
விஜயகாந்துக்கு முதல் எழுத்து, விருத்தாசலத்திற்கும் முதல் எழுத்து, விருத்தாசலத்தில் உள்ள முக்கிய வழிபாட்டு தெய்வமான விருத்தகிரீஸ்வரருக்கும் முதல் எழுத்து `வி’ என்பதால் இந்த `வி’ சென்டிமென்ட் ஒர்க்அவுட் ஆகுமென்று ஜோதிடர்கள் அறிவுறுத்தி இருக்கிறார்கள். இதனாலேயே அவர் விருத்தாசலம் தொகுதியை தேர்வு செய்து களமிறங்கினார் என்று சொல்லப்படுவதுண்டு. இந்த சென்டிமென்ட் அடிப்படையிலேயே கடந்த 2021ம் ஆண்டு தேர்தலில், அமமுகவுடன் கூட்டணி அமைத்த பிரேமலதா விருத்தாசலத்தில் போட்டியிட்டார்.
2025ல் நடந்த மக்களவை தேர்தலில் அவரது மகன் விஜயபிரபாகரன் `வி’யில் தொடங்கும் விருதுநகர் நாடாளுமன்ற தொகுதியில் களமிறங்கினார். அதேபோல எதிர்வரும் சட்டமன்ற தேர்தலில் திமுக கூட்டணியில் இணைந்துள்ள தேமுதிக, விஜயபிரபாகரனை `வி’யில் ஆரம்பிக்கும் விருதுநகர் சட்டமன்ற தொகுதியில் நிறுத்தலாம் என யோசித்து வருவதாக கூறப்படுகிறது. இந்த `வி’ சென்டிமென்ட் படியே பிரேமலதாவும் விருத்தாசலம் தொகுதியில் களம் இறங்குவார் எனவும் பேச்சு அடிபடுகிறது.
