பாஜ கூட்டணியில் அதிமுக இல்லை: மேலிட பொறுப்பாளர் பேச்சால் பரபரப்பு

புதுச்சேரியில் ஆளும் தேசிய ஜனநாயக கூட்டணியில் என்.ஆர்.காங்கிரஸ், பாஜ, அதிமுக ஆகிய கட்சிகள் உள்ளன. இந்த தேர்தலிலும் இந்த கூட்டணியே தொடர்கிறது. கூடுதலாக புதிதாக சமீபத்தில் லாட்டரி அதிபர் மார்ட்டின் மகன் ஜோஸ் சார்லஸ் தொடங்கிய லட்சிய ஜனநாயக கட்சியும் இந்த கூட்டணியில் இணைந்து உள்ளது. மொத்தம் உள்ள 30 தொகுதியில் என்.ஆர். காங்-16, பாஜ-10, அதிமுக-2, லஜக-2 என தொகுதி பங்கீடு இறுதி செய்யப்பட்டுள்ளது.

2 மாதத்துக்கு முன் தொடங்கிய கட்சிக்கும் 2 சீட், 53 ஆண்டு கட்சிக்கும் 2 சீட் என ஒதுக்கப்பட்டுள்ளதால், புதுச்சேரி அதிமுகவினர் அதிருப்தியடைந்து உள்ளனர். இதுதொடர்பாக கட்சியின் பொதுச்செயலாளர் எடப்பாடி பழனிசாமிக்கு, புதுச்சேரி அதிமுக, அதிக இடங்களை கட்சிக்கு பெற்றுத்தர வேண்டும். இல்லாவிட்டால் புதுச்சேரியில் தனித்து களமிறங்கலாம் என கூறியதாக தெரிகிறது.

இதன்காரணமாக புதுச்சேரியில் தேஜ கூட்டணியில் அதிமுக நீடிக்கிறதா? என்ற குழப்பம் நிலவி வந்தது. இந்நிலையில், புதுச்சேரிக்கு மார்ச் 1ம் தேதி பிரதமர் மோடி வருகை தர உள்ள நிலையில், இதுதொடர்பாக பாஜ மாநில தலைவர் ராமலிங்கம் தலைமையில், மேலிட பொறுப்பாளர் நிர்மல் குமார் சுரானா, சபாநாயகர் செல்வம், உள்துறை அமைச்சர் நமச்சிவாயம், எம்எல்ஏக்கள் கல்யாணசுந்தரம், ராஜசேகர் ஆகியோர் நேற்று துணைநிலை ஆளுநரை நேரில் சந்தித்து ஆலோசனை நடத்தினர்.

பின்னர் வெளியே வந்த மேலிட பொறுப்பாளர் நிர்மல்குமார் சுரானா கூறுகையில், ‘‘பிரதமர் மோடி வருகைக்கான ஏற்பாடுகள் குறித்து ஆலோசனை செய்தோம். என்.ஆர்.காங்கிரஸ், பாஜ கூட்டணி ஏற்கனவே முடிவு செய்யப்பட்டு விட்டது. அதிமுக, பாமக, லஜக ஆகிய கட்சிகளுடன் கூட்டணி பேச்சுவார்த்தை நடத்தி வருகிறோம். தமிழகத்தில் உள்ள அதிமுக எங்கள் கூட்டணியில் உள்ளது. ஆனால் புதுச்சேரியில் எங்கள் கூட்டணியில் அதிமுக தற்சமயம் இல்லை. விரைவில் பேச்சு வார்த்தைக்கு பின்பு கூட்டணிக்குள் வரும்.

தொகுதி பங்கீடு குறித்து இன்னும் இறுதி முடிவு செய்யவில்லை. மேலும், சில கட்சிகள் கூட்டணிக்கு வரவுள்ளது. புதுச்சேரியில் பாஜ, தமிழகத்தில் தவெகவுடன் என்.ஆர் காங்கிரஸ் கூட்டணி என்ற தகவல் வெறும் வதந்தி, உண்மையில்லை. ரங்கசாமி அதிகாரப்பூர்வமாக இது குறித்து ஏதும் சொல்லவில்லை. எல்ஜேகே, தேஜ கூட்டணிக்கு வருவதை ரங்கசாமி விரும்பவில்லை என்பது தவறானது. அவர்களுடன் பேச்சு நடத்தி வருகிறோம்’’ என்றார்.