ஊட்டி சட்டமன்ற தொகுதியில், எந்த கட்சிக்கு சீட் என்பது தெரியாத நிலையில், தனக்கு எப்படியும் சீட் கிடைத்து விடும் என்ற நம்பிக்கையில் அதிமுக மாவட்ட செயலாளர் கப்பச்சி வினோத், தொகுதி முழுவதும் நலத்திட்ட உதவிகள் வழங்குவது, ஹாட்பாக்ஸ், பாத்திரம் உள்ளிட்ட பரிசு பொருட்கள் வழங்குவது என மும்முரம் காட்டி வருகிறார். ஊட்டி தொகுதியை பொறுத்த வரை யார் எம்எல்ஏ என்று தீர்மானிப்பது நகரில் உள்ள வாக்குகள்தான். நகரப்பகுதிகளில் சிறுபான்மையின மக்கள் மற்றும் இதர மக்களின் வாக்குகளே அதிகம்.
இந்த சூழலில் அதிமுக, நாங்கள்தான் சிறுபான்மையின மக்களின் பாதுகாவலர் என கூறிக்கொண்டாலும், வடஇந்தியாவில் சிறுபான்மையின மக்களுக்கு எதிரான கருத்துகளையும், துன்புறுத்தல்களையும் செய்து வரும் பாஜவுடன் கூட்டணி வைத்திருப்பதால் சிறுபான்மையின மக்களின் வாக்குகள் அதிமுகவிற்கு கிடைப்பது சந்தேகமே என்ற பேச்சு ஊட்டி முழுவதும் உள்ளது.
இந்த சூழலில் இருமுறை ‘சீட்’ கிடைத்தும், தோல்வியடைந்த நிலையில், இம்முறையும் ‘சீட்’ கிடைத்து தோல்வியடைந்து விட்டால் தனது அரசியல் வாழ்க்கை முடிவுக்கு வந்துவிடுமோ என்ற அச்சத்தில் இருக்கும் கப்பச்சி வினோத், கடந்த முறை வாக்குகள் குறைந்த பகுதிகள் மற்றும் சிறுபான்மையின மக்கள் அதிகம் வசிக்கும் இடங்களை முக்கியத்துவம் கொடுத்து பரிசுப்பொருட்களை விநியோகித்து வருகிறார். ஊட்டி நகரில் வாகன பிரசாரத்தை துவக்கியுள்ள அவர், பிரசார வாகனத்தில் அதிமுக கொடியை மட்டுமே கட்டியுள்ளார்.
கூட்டணியில் உள்ள மற்ற கட்சி கொடிகள் எதுவும் கிடையாது. குறிப்பாக, பாஜ கொடி கிடையாது. மேலும், பிரசாரத்தில் அதிமுகவினர் மட்டுமே பங்கேற்கின்றனர். பாஜவில் இருந்து யாரையும் அவர் அழைப்பதில்லையாம். சிறுபான்மை மக்கள் வசிக்கக்கூடிய பகுதிகளில் பிரசாரம் மேற்கொள்ளும்போது பாஜ கொடி மற்றும் அக்கட்சியினருடன் சென்று பிரசாரம் செய்தால் கிடைக்கிற ஓட்டும் போய் விடுமோ என்ற பயத்தில்தான் கப்பச்சி கவனமாக காய் நகர்த்துகிறாராம்.
