வேலூர் மாவட்டம் கே.வி.குப்பம் அடுத்த சென்னங்குப்பம் பகுதியை சேர்ந்தவர் பாக்ஸர் சுரேஷ் (34). இவர் பாஜவில் இளைஞர் அணி நிர்வாகியாக இருந்து வருகிறார். இந்நிலையில் இவர் அணைக்கட்டு தொகுதிக்கு போட்டியிட விருப்ப மனு அளிக்க உள்ளதாக கூறப்படுகிறது. இது, பாஜவில் உள்ள சிலருக்கே பிடிக்கவில்லையாம். இந்த நிலையில் சில தினங்களுக்கு முன்பு இரவில் இவரது வீட்டிற்கு மர்ம ஆசாமிகள் இருவர் அத்துமீறி சென்று பாக்ஸர் சுரேஷை தாக்க முயன்றார்களாம்.
அவரது கூச்சல் கேட்டதும் திரண்ட அக்கம் பக்கத்தினர் அந்த 2 பேரையும் பிடித்து, தர்ம அடி கொடுத்து காவல் நிலையம் அழைத்துச் சென்று ஒப்படைத்தனர். மேலும் இது தொடர்பாக பாக்ஸர் சுரேஷ் கே.வி.குப்பம் காவல் நிலையத்தில் அளித்த புகாரின் பேரில் போலீசார் விசாரித்து வருகின்றனர். போலீஸ் விசாரணையில் பிடிபட்ட 2 பேரும் பள்ளிகொண்டா பகுதியை சேர்ந்தவர்கள் என்றும் பாஜவை சேர்ந்த மாநில நிர்வாகியான கிளி சதீஷ்குமார் (35) அனுப்பிய ஆட்கள் என்றும் தெரியவந்தது.
சதீஷ்குமார் அணைக்கட்டு தொகுதியை சேர்ந்தவர் என்பதால் அவரது தொகுதிக்கு பாக்ஸர் சுரேஷ் விருப்ப மனு கொடுக்க இருப்பது தொடர்பாக இருதரப்பினருக்கும் இடையே தகராறு இருந்து வந்ததாக கூறப்படுகிறது. இதனால், பாக்ஸர் சுரேஷை மிரட்டவே, சதீஷ்குமார் ஆள் அனுப்பியது தெரிந்தது. நேற்று முன்தினம் வேலூரில் இருதரப்பையும் சேர்ந்த ஆதரவாளர்கள் பாஜ மாநில நிர்வாகி கார்த்தியாயினி காரை முற்றுகையிட்டு வாக்குவாதம் செய்த சம்பவம் அடக்குவதற்குள் தற்போது இவரை அடிக்க ஆள் அனுப்பிய சம்பவம் கட்சிக்குள் சலசலப்பை ஏற்படுத்தியுள்ளது.
