சென்னை: ஏராளமான வெற்றிப் படங்களின் விநியோகஸ்தராக இருந்து, தேசிய விருது பெற்ற மற்றும் பல சூப்பர் ஹிட் படங்களின் தயாரிப்பாளராக உயர்ந்து, பிறகு ‘அநீதி’, ‘வாழை’ உள்பட பல படங்களில் நடிகராகவும் முத்திரை பதித்துள்ள ஜேஎஸ்கே இயக்குனராக அறிமுகமாகும் படம், ‘ஃபயர்’. இது விரைவில் ரிலீசாகிறது. சென்சார் போர்டு ‘ஏ’ சான்றிதழ் வழங்கிபாராட்டியுள்ளது. ‘நம் சமுதாயத்துக்கு மிகவும் தேவையான, அதேவேளையில் மிகவும் துணிச்சலான கருத்து களுடன் உருவாகியுள்ள ‘ஃபயர்’ படம், வயதுக்கு வந்திருக்கும் அனைவரும் கட்டாயம் பார்க்க வேண்டிய படம்’ என்று ஜேஎஸ்கே சொன்னார்.

இதில் பாலாஜி முருகதாஸ், ரக்‌ஷிதா மகாலட்சுமி, சாக்‌ஷி அகர்வால், காயத்ரி ஷான், சாந்தினி தமிழரசன், சிங்கம்புலி, சுரேஷ் சக்ரவர்த்தி, பத்மன் நடித்துள்ளனர். தமிழகத்தை உலுக்கிய ஒரு நிஜ சம்பவத்தை மையப்படுத்திய படமான இதை ஜேஎஸ்கே பிலிம் கார்ப்பரேஷன் தயாரித்துள்ளது. மதுரகவி பாடல் கள் எழுத, டிகே இசை அமைத்துள்ளார். சதீஷ் ஜி.பாபு ஒளிப்பதிவு செய்துள்ளார். இயக்குனரும், நடிகருமான எஸ்.கே.ஜீவா வசனம் எழுதியுள்ளார்.