பீஜிங்: சீனாவின் தொழில்நுட்ப நிறுவனங்கள் மீதான அமெரிக்காவின் தடைக்கு பதிலடியாக, அமெரிக்க ராணுவ நிறுவனங்கள் மீது சீனா ஏற்றுமதி கட்டுப்பாடுகளை விதித்துள்ளது. அமெரிக்க பாதுகாப்பு துறை மற்றும் வர்த்தக துறை இணைந்து கடந்த மாதம் சீனாவின் முன்னணி தொழில்நுட்ப மற்றும் உற்பத்தி நிறுவனங்கள் மீது கடும் கட்டுப்பாடுகளை விதித்தன. சீனாவின் முன்னணி இகாமர்ஸ் நிறுவனமான அலிபாபா, முன்னணி தேடுபொறி நிறுவனமான பைடு, மின்சார வாகன தயாரிப்பு நிறுவனமான பிஒய்டி, நியோ உள்ளிட்ட 180 நிறுவனங்களை அமெரிக்கா தனது சீன ராணுவ கூட்டு நிறுவனங்கள் பட்டியலில் சேர்த்தது.

இதனால், இந்நிறுவனங்கள் சீன ராணுவத்துடன் தொடர்பில் இருப்பதால், அமெரிக்க ராணுவத்திற்கான எந்தவொரு ஒப்பந்தத்தையும் வழங்க அமெரிக்கா தடை விதித்தது. இதற்கு பதிலடியாக சீனாவும் தற்போது கடும் நடவடிக்கை எடுத்துள்ளது. டிரோன், ஏவுகணைகள், மின்சார வாகனங்கள், விண்வெளி தயாரிப்புகள் செய்வதற்கு தேவையான அரிய வகை கனிமங்களை சீனாவிடமிருந்து வாங்குவதற்கு அமெரிக்காவின் 10 பாதுகாப்பு நிறுவனங்களுக்கு தடை விதித்துள்ளது. இந்த நிறுவனங்களுக்கு சீனாவிடமிருந்து இரட்டை பயன்பாட்டு பொருட்கள் (ராணுவம் மற்றும் ராணுவமல்லாத பயன்பாடுகளை கொண்ட பொருட்கள்) ஏற்றுமதி செய்யப்படாது என அறிவித்துள்ளது.

மேலும், சீன அரசு நிறுவனங்கள் மற்றும் பொதுத்துறை நிறுவனங்கள், லாக்ஹீட் மார்ட்டின் மற்றும் ரேதியான் ஏவுகணைகள் மற்றும் பாதுகாப்பு உள்ளிட்ட 46 அமெரிக்க நிறுவனங்களின் தயாரிப்புகளை நேரடியாக வாங்க நிதி அமைச்சகம் தடை விதித்துள்ளது. சீனாவிடமிருந்து வாங்கிய மூலப்பொருட்களைப் பயன்படுத்தி, உலகின் எந்தவொரு நாட்டைச் சேர்ந்த நிறுவனமோ அல்லது தனிநபரோ தடை விதிக்கப்பட்ட அமெரிக்க நிறுவனங்களுக்கு அவற்றை மறுஏற்றுமதி செய்யக் கூடாது எனவும் கடுமையான விதிகள் கொண்டு வரப்பட்டுள்ளது.

இந்தியாவின் பாதுகாப்பு ஒப்பந்தத்திற்கு ஒப்புதல்
அமெரிக்காவிடம் வாங்கப்பட்ட 28 அப்பாச்சி ஹெலிகாப்டர் மற்றும் எம்777ஏ2 ஹோவிட்சர் பீரங்கிகளை இந்திய ராணுவம் பயன்படுத்தி வருகிறது. இவைகளுக்கான பராமரிப்பு சேவை வழங்கும் ரூ.4,500 கோடி மதிப்பிலான ஒப்பந்தத்திற்கு அமெரிக்கா அதிகாரப்பூர்வமாக ஒப்புதல் வழங்கி உள்ளது. இதன் மூலம் பீரங்கிகளுக்கான உதிரிபாகங்கள், பழுதுபார்த்தல், தொழில்நுட்ப உதவிகள் மற்றும் பயிற்சி ஆகியவையும், ஹெலிகாப்டர்களுக்கான பொறியியல், தளவாட ஆதரவு மற்றும் பணியாளர்களுக்கான பயிற்சிகள் வழங்கப்படும் என அறிவிக்கப்பட்டுள்ளது.

அடுத்த கட்டத்தில் வர்த்தக போர்
சீனாவின் இந்த பதில் நடவடிக்கையால் அமெரிக்கா-சீனா இடையேயான வர்த்தக போர் அடுத்தகட்டத்தை நோக்கி நகரத் தொடங்கி உள்ளது. அமெரிக்கா தனது தொழில்நுட்பங்கள் சீனாவுக்கு செல்வதை தடுக்க முயற்சிப்பதும், சீனா தனது அரியவகை கனிமங்கள் அமெரிக்கா செல்வதை தடுக்க முயற்சிப்பது உலக விநியோக சங்கிலியிலும் பாதிப்பை ஏற்படுத்தக் கூடும் என அஞ்சப்படுகிறது.