லாஸ் ஏஞ்சலஸ்:‘தி ரிங்’ மற்றும் ‘லிலோ அண்ட் ஸ்டிட்ச்’ போன்ற உலகப்புகழ் பெற்ற படங்களில் நடித்த பிரபல ஹாலிவுட் நடிகை டேவி சேஸ் உடல்நலக்குறைவால் உயிரிழந்தார். பிரபல ஹாலிவுட் நடிகையான டேவி சேஸ் (35), கடந்த 2002ம் ஆண்டில் வெளியான ‘தி ரிங்’ திரைப்படத்தில் ‘சாமாரா’ என்ற பேய் கதாபாத்திரத்தில் நடித்து உலகளவில் கவனத்தை ஈர்த்தார். கடந்த 2016ம் ஆண்டு நடந்த ஒரு பைக் விபத்தில் இவருக்கு முதுகுத்தண்டில் பலத்த காயம் ஏற்பட்டது. அதற்காக அவர் எடுத்துக்கொண்ட தொடர் சிகிச்சை மற்றும் வலி நிவாரணிகள், அவரை காலப்போக்கில் போதைப்பொருள் பழக்கத்திற்கு அடிமையாக்கியது. இதனால் அவரது வாழ்க்கை முற்றிலும் சீர்குலைந்து, ஒரு கட்டத்தில் அவர் வீடற்ற நிலைக்குத் தள்ளப்பட்டார்.

தவறான நபர்களின் நட்பால் போதைக்கு அடிமையான அவர், கடந்த 2024ம் ஆண்டு ஜூன் மாதத் தொடக்கத்தில் ஊட்டச்சத்துக் குறைபாடு காரணமாக லாஸ் ஏஞ்சலஸ் மருத்துவமனையில் அனுமதிக்கப்பட்டார். இந்நிலையில், நடிகை டேவி சேஸ் கடந்த 16ம் தேதி அன்று மூளைக்காய்ச்சல் மற்றும் ரத்தத் தொற்று காரணமாக சிகிச்சை பலனின்றி உயிரிழந்தார். இது குறித்து அவரது தாய் கேதி சேஸ் உருக்கமாக கூறுகையில், ‘என் மகளின் இறப்புச் செய்தி கேட்டதும் உள்ளுக்குள் ஏதோ ஒன்று வெடிப்பது போன்ற உணர்வு ஏற்பட்டது. போதைப்பொருள் பழக்கத்தால் அவள் தனது சுயநினைவை முழுவதுமாக இழந்திருந்தாள். அவளைத் தேடி பிணவறையில் அடையாளம் தெரியாத சடலங்கள் பட்டியலை நான் பலமுறை வேதனையுடன் பார்த்துள்ளேன். இறுதியில் மருத்துவமனையில் கண்ணாடியின் வழியாக அவளைத் தொட்டு பிரார்த்தனை செய்தேன்’ என்று தெரிவித்தார். ‘டோனி டார்கோ’, ‘பிக் லவ்’ உள்ளிட்ட பல படங்களில் நடித்த அவரது மறைவு ஹாலிவுட் திரையுலகில் சோகத்தை ஏற்படுத்தியுள்ளது.