ஷிவானியை காதலிக்கிறார் தில் நட்ராஜ். கடந்த கால கசப்பான அனுபவங்களை கடந்து அவர்கள் கணவன், மனைவி ஆகின்றனர். ஆனால், நிகழ்காலத்தில் தில் நட்ராஜ் தனது மனைவி இறந்துவிட்டதாக நினைத்து, அதற்கு காரணமானவர்களை பழிவாங்க புறப்படுகிறார். ஷிவானி சந்தித்த கசப்பான அனுபவம் என்ன? அவரது இறப்புக்கு என்ன காரணம் என்பது மீதி கதை. போலீஸ் அதிகாரியாக வரும் தில் நட்ராஜ், சராசரி மனிதனாக காதலிக்கிறார். காதலியை சீரழித்தவர்களை பழிவாங்க கோபத்துடன் களமிறங்குகிறார். அழகாக இருக்கும் ஷிவானி, திருமணம் என்ற பெயரில் தன்னை சீரழித்தவர்களை கொல்ல புறப்படும்போது மிரட்டலாக இருக்கிறது.
பகவதி பாலா அலட்டிக்கொள்ளாமல் நடித்துள்ளார். மோசடி நபர்களுக்கு உதவும் காமெடி நடிகர் செந்தில், வில்லனாக மாறியிருக்கிறார். இமான் அண்ணாச்சி, திருச்சி சாதனா சேர்ந்து லூட்டி அடித்துள்ளனர். கதைக்கேற்ற ஒளிப்பதிவு இடம்பெற்றுள்ளது. பின்னணி இசையின் மூலம் காட்சிகளுக்கு ஏ.சி.ஜான் பீட்டர் மெருகூட்டியுள்ளார். ஒரே நபர் பல பெண்களை திருமணம் செய்யும் விஷயத்தை வைத்து, விறுவிறுப்பான கிரைம் திரில்லர் படத்தை கொடுக்க இயக்குனர் பகவதி பாலா முயற்சித்துள்ளார். படத்தின் மேக்கிங்கில் பல குறைகள் இருந்தாலும், கதையின் மூலம் சமூகத்துக்கு விழிப்புணர்வு ஏற்படுத்த நினைத்ததை பாராட்டலாம்.
