மண்டபம்: இலங்கையில் இருந்து கடத்தி வரப்பட்ட தங்கத்தை மண்டபம் பகுதியில் இருந்து ராமநாதபுரத்தை நோக்கி சாலை மார்க்கமாக கடத்தி செல்வதாக மத்திய வருவாய் புலனாய்வுத்துறைக்கு ரகசிய தகவல் கிடைத்துள்ளது. அதன்பேரில் அதிகாரிகள், ராமநாதபுரம் பேருந்து நிலையம் பகுதியில் நேற்று கடத்தல்காரர்களை வளைத்து பிடித்தனர். அவர்கள் வைத்திருந்த பார்சலை சோதனையிட்டபோது, தங்கக்கட்டிகள் இருந்தது. அதிகாரிகள் அதனை பறிமுதல் செய்து, கடத்தி வந்த 2 பேரை ராமநாதபுரம் சுங்கத்துறை அலுவலகத்திற்கு அழைத்து சென்று விசாரணை நடத்தினர். இதில் மண்டபம் பகுதியை சேர்ந்த நாசர், ராமநாதபுரம் கேணிக்கரையை சேர்ந்த செய்யது இப்ராஹிம் என தெரிய வந்தது.

இலங்கையில் இருந்து படகு மூலம் நான்கரை கிலோ தங்கத்தை கடத்தி வந்து, அந்நாட்டை சேர்ந்தவர்கள் மண்டபம் அருகே கடலோர பகுதியில் தங்களிடம் கொடுத்து சென்றதாக இருவரும் தெரிவித்தனர். பறிமுதல் செய்யப்பட்ட தங்கத்தின் இந்திய மதிப்பு ரூ.3 கோடி இருக்கும் என முதல் கட்ட விசாரணையில் தெரியவந்தது. இதையடுத்து அவர்களை கைது செய்த அதிகாரிகள், இலங்கையில் இருந்து கடத்தி வரப்பட்ட தங்கம், தமிழகத்தில் யாருக்கு கொண்டு வரப்பட்டது என்பது பற்றி விசாரணை நடத்தி வருகின்றனர்.

 

The post இலங்கையில் இருந்து கடத்திய 4.50 கிலோ தங்கத்துடன் 2 பேர் பிடிபட்டனர் appeared first on Dinakaran.