பாஜதான் அவர நம்பிட்டு இருக்கு ஆனா… லஜகவை பார்த்து ரங்கசாமி பயந்துட்டாரு: கெத்து காட்டும் லாட்டரி அதிபர் மகன்

என்.ஆர் காங்கிரஸ் கூட்டணியில் தொடர வேண்டுமானால் லஜகவை சேர்க்க கூடாது என முதல்வர் ரங்கசாமி பாஜவுக்கு நிபந்தனை விதித்துள்ளார். இதுதொடர்பாக டெல்லியில் இருந்து முதல்வரிடம் பேச்சு நடத்த ஒன்றிய அமைச்சர் மன்சுக் மாண்டவ்யாவை நேற்று மாலை புதுச்சேரி வந்தார். தனியார் ஓட்டலில் என்.ஆர். காங்கிரஸ் குழு மற்றும் லட்சிய ஜனநாயக கட்சி தலைவர் சார்லஸ் மார்ட்டின் ஆகியோர் தனித்தனியாக சந்தித்து பேசினர். சந்திப்புக்கு பின் சார்லஸ் மார்ட்டின் கூறுகையில், ‘‘ஒன்றிய அமைச்சரை சந்தித்து பேச்சுவார்த்தை நடத்தியிருக்கோம். தற்போது வரை கூட்டணி தொடர்பாக குழப்பம் உள்ளது. நாங்கள் எல்லாவற்றுக்கும் தயாராக இருக்கிறோம். முதல்வர் தன்னுடைய முடிவை சீக்கிரம் சொன்னால் நன்றாக இருக்கும். நாங்கள் எதுவும் ஒன்றிய அமைச்சரிடம் வலியுறுத்தவில்லை.

முதல்வர் ரங்கசாமி, எங்களை(லஜக) பார்த்து பயந்து விட்டார் என்று சொல்கிறார்கள். புதுவை மக்களுக்கு சேவை செய்ய வந்துள்ளேன். எவ்வளவோ எதிர்ப்பு வருகிறது. நான் யாரையும் எதிர்ப்பாக பார்க்கவில்லை. அரசியலுக்கு புதிதாக வந்த கட்சிக்கு, இவ்வளவு அங்கீகாரம் கிடைத்துள்ளதை பெரிதாகப் பார்க்கிறேன். தேர்தல் ஆணையம் விரைவாக சின்னம் கொடுத்தற்கு நன்றி. இதனை மக்களிடம் கொண்டு சேர்க்க வேண்டும். தற்போது ஒன்றிய அமைச்சரிடம் பேசியபோது முதல்வர் எடுக்கும் முடிவை பொருத்துதான் முடிவு செய்யப்படும் என கூறுகின்றனர். பாஜ தான் முதல்வர் ரங்கசாமியை நம்பி கொண்டு இருக்கிறார்கள். பேச்சுவார்த்தைக்காக காத்திருக்கின்றனர். கூட்டணிக்கு முதல்வர் வந்தால் நல்லது, வராவிட்டால் ரொம்ப நல்லது’’ என்றார்.

ஊர் ஊரா சுத்தாதீங்க…
‘‘தேர்தல் நேரத்தில் முதல்வர் ரங்கசாமி வெளியூர் சென்று ஊர்ச்சுற்றி கொண்டிருப்பது, விளையாட்டு தனத்தை காட்டுகிறது. சீக்கிரம் முடிவு செய்துவிட்டால் அடுத்த வேலை பார்க்க தயாராக இருக்கிறோம். எங்கள் வேட்பாளர்களுக்கு மனுத்தாக்கல் விஷயத்தில் பதில் சொல்ல வேண்டியுள்ளது. முதல்வர் ஊர் சுற்றாமல் திரும்பி வந்து முடிவு எடுத்தால் நன்றாக இருக்கும்’’ என்றார்.