சென்னை: கனடா அணிக்கு எதிரான உலகக் கோப்பை டி20 தொடர் போட்டியில் நேற்று, நியூசிலாந்து அணி 8 விக்கெட் வித்தியாசத்தில் சிறப்பான வெற்றியை பதிவு செய்து, சூப்பர் 8 சுற்றுக்குள் நுழைந்தது. உலகக் கோப்பை டி20 தொடரின் 31வது போட்டி, சென்னையில் நேற்று, டி பிரிவில் நடந்தது. டாஸ் வென்ற கனடா அணி, பேட்டிங்கை தேர்வு செய்தது. அதையடுத்து களமிறங்கிய அந்த அணியின் துவக்க வீரர்கள் யுவராஜ் சாம்ரா, கேப்டன் தில்பிரீத் பஜ்வா அட்டகாசமாக ஆடி ரன் குவிப்பில் ஈடுபட்டனர்.
14 ஓவரில் 116 ரன்கள் குவித்திருந்த நிலையில், முதல் விக்கெட்டாக தில்பிரீத் 36 ரன்னில் அவுட்டானார். பின் வந்த நவ்நீத் தாலிவால் 10 ரன்னிலும், நிகோலஸ் கிர்டோன் 2 ரன்னிலும் ஆட்டமிழந்தனர். மற்றொரு துவக்க வீரரான யுவ்ராஜ் சாம்ரா, 65 பந்துகளில் 6 சிக்சர் 11 பவுண்டரிகளுடன் 110 ரன்கள் விளாசி கடைசி ஓவரில் ஆட்டமிழந்தார். அதனால், கனடா 20 ஓழவரில் 4 விக்கெட் இழப்புக்கு 173 ரன்கள் எடுத்தது.
பின்னர், 174 ரன்கள் வெற்றி இலக்குடன் நியூசிலாந்தின் டிம் செபெர்ட், ஃபின் ஆலன் களமிறங்கினர். சாத் பின் ஜபர் வீசிய 3வது ஓவரில் டிம் 6 ரன்னிலும், அடுத்த ஓவரை வீசிய டிலோன் ஹெலிகர் பந்தில் ஆலன் 21 ரன்னிலும் விக்கெட்டுகளை இழந்தனர்.
இருப்பினும், அதன் பின் இணை சேர்ந்த ரச்சின் ரவீந்திரா (39 பந்து, 3 சிக்சர், 4 பவுண்டரி, 59 ரன்), கிளென் பிலிப்ஸ் (36 பந்து, 6 சிக்சர், 4 பவுண்டரி, 76 ரன்), கனடா வீரர்களின் பந்துகளை வேட்டையாடி ரன் குவித்தனர். இவர்களின் அதிரடியால் நியூசிலாந்து 15.1 ஓவரிலேயே 2 விக்கெட் மட்டும் இழந்து 176 ரன் விளாசி அபார வெற்றி பெற்றது. 8 விக்கெட் வித்தியாசத்தில் கிடைத்த இந்த வெற்றி மூலம் டி பிரிவில் 6 புள்ளிகளுடன் 2வது அணியாக, சூப்பர் 8 சுற்றுக்குள் நியூசிலாந்து நுழைந்தது.
* 19 வயதில் சாம்ரா சதம் டி20 வரலாற்றில் சாதனை
நியூசிலாந்து அணிக்கு எதிராக சதம் விளாசிய கனடா வீரர் யுவராஜ் சாம்ரா இந்திய வம்சாவளியை சேர்ந்தவர். 19வது வயதில் சதம் விளாசிய அவர், டி20 உலகக் கோப்பை வரலாற்றில் இளம் வயதில் சதம் விளாசிய வீரர் என்ற மகத்தான சாதனையை நேற்று அரங்கேற்றினார்.
அவரது தந்தை பல்ஜித் சாம்ரா, இந்திய கிரிக்கெட் ஜாம்பவான் யுவராஜ் சிங்கின் தீவிர ரசிகர் என்பதால், அவரது பெயரை தனது மகனுக்கு சூட்டியுள்ளார். யுவராஜ் சாம்ரா, கடந்த 2025 மார்ச் மாதம் சர்வதேச போட்டிகளில் ஆடத் துவங்கினார். தனது 19வது போட்டியிலேயே யுவராஜ் சாம்ரா உலக சாதனையை நிகழ்த்தி அசத்தியுள்ளார்.
