மீனம்பாக்கம்: தாய்லாந்து தலைநகர் பாங்காக்கிலிருந்து, சென்னைக்கு வரும் தனியார் பயணிகள் விமானத்தில், பெருமளவு போதைப்பொருள் கடத்தி வரப்படுவதாக, சென்னை மத்திய வருவாய் புலனாய்வு துறை அதிகாரிகளுக்கு ரகசிய தகவல் கிடைத்தது. இதையடுத்து அதிகாரிகள் தீவிர கண்காணிப்பில் ஈடுபட்டனர். அவர்களுடன் சுங்கத்துறை அதிகாரிகளும் கண்காணித்தனர். இந்நிலையில் நேற்று முன்தினம் நள்ளிரவு பாங்காக்கில் இருந்து வந்த பயணிகள் விமானத்தில் வந்த சந்தேகத்துக்கு இடமான சென்னையை சேர்ந்த 30 வயது மதிக்கத்தக்க ஆண் பயணியை நிறுத்தி விசாரித்தனர். அவர், 2 நாட்களுக்கு முன்பு, சுற்றுலா பயணியாக, தாய்லாந்துக்கு சென்று விட்டு, மறுநாளே சென்னைக்கு திரும்பியது தெரியவந்தது. அவர் மீது சந்தேகம் ஏற்பட்டதால் தீவிரமாக விசாரித்தனர். முன்னுக்கு பின் முரணாக பேசினார். அவரது உடமைகளை சோதனை நடத்தினர்.
சூட்கேசை திறந்து பார்த்தபோது, ரகசிய அறை இருந்தது. அதை உடைத்து பார்த்தபோது 3.6 பதப்படுத்தப்பட்ட உயர்ரக ஹைட்ரோபோனிக் கஞ்சா இருந்ததை கண்டுபிடித்தனர். அதன் சர்வதேச மதிப்பு ரூ.3.6 கோடி. இதையடுத்து கஞ்சா கடத்தல் பயணியை அதிகாரிகள் கைது செய்து கஞ்சாவை பறிமுதல் செய்தனர். மேலும் விசாரணையில், அவர், சர்வதேச போதை கடத்தும் கும்பலில் குருவியாக வேலை செய்கிறார் என தெரிந்தது. சர்வதேச போதை கடத்தும் கும்பலை சேர்ந்த முக்கிய நபர்கள் சென்னையில் எங்கு இருக்கிறார்கள் என விசாரணை நடத்தி, அவர்களையும் கைது செய்ய அதிகாரிகள் நடவடிக்கை எடுத்து வருகின்றனர். சென்னை விமான நிலையத்தில், இதேபோல தொடர்ச்சியாக உயர்ரக பதப்படுத்தப்பட்ட ஹைட்ரோபோனிக் கஞ்சா கடத்தல் சம்பவம் நடந்து வருகிறது.
கடந்த நவம்பர் 21ம் தேதி சென்னையை சேர்ந்த ஒரு பெண் 2.8 ஒரு கிலோ மதிப்புடைய ஹைட்ரோ போனிக் கஞ்சா கடத்தி வந்து கைதானார். கடந்த 16ம் தேதி ரூ.7.6 கோடி மதிப்புடைய 7.6 கிலோ உயர் ரக பதப்படுத்தப்பட்ட கஞ்சாவை கடத்தி வந்த ஆண் பயணி கைது செய்யப்பட்டார். தற்போது 3வது சம்பவமாக சென்னை பயணி கைதாகியுள்ளார். ஒரே மாதத்தில் 3 சம்பவங்களில் ரூ.14 கோடி மதிப்புடைய 14 கிலோ உயர்ரக ஹைட்ரோபோனிக் கஞ்சா பறிமுதல் செய்யப்பட்டு, 3 கடத்தல் குருவிகள் கைது செய்யப்பட்டுள்ளது குறிப்பிடத்தக்கது.
The post தாய்லாந்தில் இருந்து விமானத்தில் சென்னைக்கு கடத்தி வந்த ரூ3.6 கோடி கஞ்சா பறிமுதல்: சர்வதேச கடத்தல் கும்பல் ‘குருவி’ கைது appeared first on Dinakaran.
