கருர், ஏப். 23: கரூர் மாவட்டத்தில் இளைஞர் விருதுபெற விண்ணப்பிக்கலாமென கலெக்டர் அழைப்பு விடுத்துள்ளார், கரூர் மாவட்ட கலெக்டர் தங்கவேல் விடுத்துள்ள செய்திக் குறிப்பில் தெரிவித்துள்ளதாவது: சமூதாய வளர்ச்சிக்கு சேவையாற்றும் இளைஞர்களது பணியை அங்கீகரிக்கும் வகையில் முதலமைச்சர் மாநில இளைஞர் விருது ஒவ்வொரு ஆண்டும் சுதந்திர தினத்தன்று 15 வயது முதல் 35 வயது வரையுள்ள 3 ஆண்கள் மற்றும் 3 பெண்களுக்கு வழங்கப்பட்டு வருகிறது. இந்த விருது ரூ. 1 லட்சம் பணம், பாராட்டு பத்திரம் மற்றும் பதக்கம் ஆகியவைகளை உள்ளடக்கியதாகும். 2025ம் ஆண்டிற்கான முதலமைச்சர் மாநில இளைஞர் விருது ஆகஸ்ட் 15ம்தேதி, நடைபெறும் சுதந்திர தின விழாவில் வழங்கப்படவுள்ளது.15 வயது முதல் 35 வயது வரையுள்ள ஆண், பெண் ஆகியோர் விண்ணப்பிக்கலாம். 01.04.2024 அன்று 15 வயது நிரம்பியவராகவும், 15.08.2025 அண்டு 35 வயதுக்கு உள்ளாகவும் இருக்க வேண்டும்.

கடந்த நிதியாண்டில் அதாவது 1.4.2024 முதல் 31.03.2025 வரை மேற்கொள்ளப்பட்ட சேவைகள் மட்டுமே கருத்தில் கொள்ளப்படும். விருதுக்கு விண்ணப்பிககும் முன்பு குறைந்தபட்சம் 5 ஆண்டுகள் தமிழகத்தில் குடியிருந்தவராக இருக்க வேண்டும். அதற்கான சான்று இணைக்கப்பட வேண்டும். விண்ணப்பத்தாரர்கள் சமூக நலனுக்காக தன்னார்வத்துடன் தொண்டாற்றியிருக்க வேண்டும். அவ்வாறு அவர்கள் செய்த தொண்டு கண்டறியபடக் கூடியதாகும், அளவிடக் கூடியதாகவும் இருக்க வேண்டும். ஒன்றிய, மாநில அரசுகள், பொதுத்துறை நிறுவனங்கள், பல்கலைக் கழகங்கள், கல்லூரிகள், பள்ளிகளில் பணியாற்றுபவர்கள் இந்த விருதுக்கு விண்ணப்பிக்க இயலாது.

விண்ணப்பத்தாரருக்கு உள்ளுர் மக்களிடம் உள்ள செல்வாக்கு விருதிற்கான பரிசீலனையில் கணக்கில் எடுத்துக் கொள்ளப்படும். இணையதளம் மூலும் விண்ணப்பித்தவுடன் அனைத்து விண்ணப்பத்தாரர்கள் தங்களுடைய சான்றிதழ்களை மாவட்ட விளையாட்டு மற்றும் இளைஞர் நலன் அலுவலரிடம் சான்றிதழ் சரிபார்ப்பதற்காக ஒப்படைக்க வேண்டும். எனவே, கருர் மாவட்டத்தில் உள்ள தகுதியுள்ளவர்கள் www.sdat.tn.gov.in என்ற இணையதளத்தில விண்ணப்பித்து பயன்பெற வேண்டும். மேலும், தகவல்களுக்கு கரூர் மாவட்ட விளையாட்டு மற்றும் இளைஞர் நலன் அலுவலரை (7401703493) தொடர்பு கொண்டு தெரிந்து கொள்ளலாம். இவ்வாறு அந்த செய்திக் குறிப்பில் தெரிவிக்கப்பட்டுள்ளது.

The post கரூர் மாவட்டத்தை சேர்ந்தவர்கள் இளைஞர் விருதுபெற விண்ணப்பிக்கலாம் appeared first on Dinakaran.