திட்டக்குடி, ஏப். 2: திட்டக்குடியில் பரபரப்பை ஏற்படுத்திய கள்ளநோட்டு அச்சடித்த வழக்கில் மேலும் 4 பேரை போலீசார் அதிரடியாக கைது செய்துள்ளனர். தலைமறைவான விடுதலை சிறுத்தைகள் கட்சி நிர்வாகியின் பாஸ்போர்ட்டை முடக்கி அவரை கைது செய்யும் நடவடிக்கையில் போலீசார் ஈடுபட்டுள்ளனர். கடலூர் மாவட்டம் திட்டக்குடி அடுத்த அதர்நத்தம் கிராமத்தைச் சேர்ந்தவர் செல்வம் (39). விடுதலை சிறுத்தைகள் கட்சியின் கடலூர் மேற்கு மாவட்ட பொருளாளராக இருந்தார்.

இவருக்கு ராமநத்தம் அருகே திருச்சி- சென்னை தேசிய நெடுஞ்சாலை பகுதியில் கொட்டகை உள்ளது. அடிதடி வழக்கு தொடர்பாக செல்வத்தை தேடி கொட்டகைக்கு ராமநத்தம் சப்-இன்ஸ்பெக்டர் ரவிச்சந்திரன் தலைமையிலான போலீசார் நேற்று முன்தினம் சென்றனர்.
போலீசை கண்டதும் அங்கிருந்த கும்பல் தப்பி ஓடியது. இதையடுத்து அந்த அறையை போலீசார் சோதனையிட்டனர். அங்கு கள்ள நோட்டுகள் அச்சடிக்கும் இயந்திரம், துப்பாக்கிகள், போலீஸ் சீருடை, ரிசர்வ் வங்கி முத்திரை உள்ளிட்டவை இருப்பதை கண்டு அதிர்ச்சியடைந்தனர்.

அப்போது செல்வத்தின் கொட்டகைக்கு வந்த திட்டக்குடி ஆலந்தூர் நவீன்ராஜ் (29), அதர்நத்தம் கார்த்திகேயன் (28) ஆகிய இருவரையும் சுற்றி வளைத்த போலீசார், இருவரையும் காவல் நிலையம் அழைத்துவந்து விசாரித்தனர். அதில், கொட்டகையில் கள்ளநோட்டுகள் அச்சடிக்கப்பட்டதும், இந்த கொட்டகை விடுதலை சிறுத்தை கட்சி நிர்வாகி செல்வத்துக்கு சொந்தமானது என்பதும், மேற்கண்ட 2 பேரும் செல்வத்திடம் டிரைவர்களாக வேலை செய்வதும் உறுதியானது. இதுதவிர கள்ளநோட்டு அச்சடிப்பு, புழக்கத்தில் விட்டது, தொடர்புடைய நபர்கள் யார், யார் என்பது தொடர்பாக திடுக்கிடும் தகவல்கள் தெரியவந்தது.

இதையடுத்து அவர்களிடமிருந்து ரூ.85 ஆயிரம் கள்ளநோட்டுகள், 4 வாக்கி டாக்கிகள், 2 ஏர்கன், சொகுசு கார், 2 டிப்பர் லாரி, 1 பொக்லைன் ஆகியவற்றை பறிமுதல் செய்தனர். பின்னர் நவீன்ராஜ், கார்த்திகேயன் ஆகிய இருவரையும் கைது செய்து கடலூர் மத்திய சிறையில் அடைத்தனர். இவ்வழக்கில் முக்கிய குற்றவாளியான செல்வம் உள்ளிட்ட மேலும் 10 பேரை மாவட்ட எஸ்பி ஜெயக்குமார் உத்தரவுக்கிணங்க 3 தனிப்படை அமைத்து போலீசார் தீவிரமாக தேடி வருகின்றனர்.

இதனிடையே செல்வத்திற்கு சென்னையிலும் ஒரு தனியார் கம்பெனி உள்ளதாக கிடைத்த தகவலின்பேரில் அங்கும் தனிப்படை போலீசார் சென்று சோதனை நடத்த முடிவு செய்துள்ளனர். இந்நிலையில், கள்ளநோட்டு வழக்கு தொடர்பாக எஸ்ஐ ஜம்புலிங்கம் தலைமையிலான தனிப்படை, கள்ளக்குறிச்சியை சேர்ந்த கொளஞ்சி மகன் சக்திவேல் (26), திட்டக்குடி அதர்நத்தம் கிராமத்தை சேர்ந்த அண்ணாதுரை மகன்கள் அரவிந்த் (30), அஜித் (24), மா.பொடையூர் கிராமத்தை சேர்ந்த பழனிவேல் மகன் வடிவேல்பிள்ளை (28) ஆகிய 4 பேரை நேற்று கைது செய்தனர்.

செல்வத்தின் டிரைவர் நவீன்ராஜ் அளித்த வாக்குமூலத்தின் அடிப்படையிலும், பிடிபட்ட 2 பேரின் செல்போன் உள்ளிட்டவற்றை பரிசோதித்ததில் கிடைத்த சில ஆதாரங்களின் அடிப்படையிலும் கைது நடவடிக்கை எடுக்கப்பட்டு உள்ளதாக தெரிகிறது. தொடர்ந்து 4 பேரிடம் இருந்து செல்போன்களை கைப்பற்றி, தனிப்படையினர் தீவிர விசாரணை நடத்தி வருகின்றனர்.

மேலும் செல்வத்தின் பாஸ்போர்ட், வங்கி கணக்கு உள்ளிட்டவற்றை முடக்கி அதன்மூலம் பணப்பரிவர்த்தனை தொடர்பான திரட்டி கள்ளநோட்டு முக்கிய புள்ளிகளை அடையாளம் காணும் நடவடிக்கைகளில் டிஎஸ்பி மோகன் தலைமையிலான தனிப்படையினர் ஈடுபட்டுள்ளனர்.

விடுதலை சிறுத்தைகள் கட்சியில் இருந்து நீக்கப்பட்ட செல்வம், வெளிநாடு தப்பிச் செல்லாமல் இருக்க சென்னை, புதுச்சேரி உள்ளிட்ட விமான நிலையங்களிலும் மப்டி உடையில் போலீசார் கண்காணிப்பு பணிகளில் ஈடுபட்டுள்ளனர். இதனிடையே கள்ளநோட்டு அச்சடிக்கப்பட்ட செல்வத்தின் கொட்டகை வீடு பூட்டு போடப்பட்டு, தொடர்ந்து காவல்துறை கண்காணிப்பில் வைக்கப்பட்டுள்ளது.

The post வி.சிறுத்தை நிர்வாகி பாஸ்போர்ட் முடக்கம் கள்ளநோட்டு அச்சடித்த வழக்கில் மேலும் 4 பேர் அதிரடி கைது: செல்போன்களை கைப்பற்றி தீவிர விசாரணை appeared first on Dinakaran.