ஈரோடு, ஏப்.2: ஈரோடு வழியாக இயக்கப்படும் கோவை-ராமேஸ்வரம் ரயிலை தினமும் இயக்க வேண்டும் என வலியுறுத்தப்பட்டுள்ளது. இது குறித்து தென்னக ரயில்வே ஆலோசனைக்குழு முன்னாள் உறுப்பினர் கே.என்.பாஷா, சென்னை தெற்கு ரயில்வே பொது மேலாளருக்கு அனுப்பியுள்ள கோரிக்கை மனுவில் கூறியிருப்பதாவது:

கோவையில் இருந்து திருப்பூர், ஈரோடு, கரூர், திருச்சி, புதுக்கோட்டை, காரைக்குடி, தேவக்கோட்டை, சிவகங்கை, மானாமதுரை, பரமக்குடி, ராமநாதபுரம் வழியாக செவ்வாய்க்கிழமை தோறும் ராமேஸ்வரத்துக்கு வாராந்திர ரயில் இயக்கப்பட்டது.  ராமேஸ்வர தீவை, ராமேஸ்வரத்துடன் இணைக்கும் புதிய பாம்பன் ரயில் பாலம் கட்டுமான பணி நடைபெற்றதால் கடந்த 2019 முதல் இந்த ரயில் இயக்குவது நிறுத்தப்பட்டது.

இதையடுத்து, கோவையில் இருந்து ராமநாதபுரம் வரை மட்டும் ரயில் இயக்கப்பட்டு வந்தது. ஆனால், மண்டபம், ராமேஸ்வரம் செல்லவில்லை. தற்போது, ரூ.550 கோடியில் கட்டப்பட்ட புதிய பாலப்பணிகள் முடிவடைந்து, 6 ஆண்டுகளுக்கு பின்னர், வரும் 6ம் தேதி பாம்பன் பாலம் திறக்கப்பட உள்ளது. அன்றையதினம், இப்பாலத்தை திறந்து வைத்த பின்னர், ராமேஸ்வரத்துக்கு ரயில்கள் சென்று வர ஒப்புதல் வழங்கப்படும்.

அதன்படி வரும் 8ம் தேதி இரவு முதல் கோவை ராமேஸ்வரம் ரயிலை இயக்க ஒப்புதல் வழங்க வாய்ப்புள்ளதாக தெரியவருகிறது. எனவே, செவ்வாய்க்கிழமை ஒரு நாள் மட்டும் இந்த ரயிலை இயக்குவதை மாற்றி, தினமும் கோவை-ராமேஸ்வரம் ரயிலை இயக்க வேண்டும். மேலும், இந்த ரயில் ஈரோடு மாவட்டத்தின் முக்கிய பரிகாரஸ்தலமாக விளங்கும் கொடுமுடி ரயில் நிலையத்தில் நின்று செல்லவும் நடவடிக்கை எடுக்க வேண்டும். இவ்வாறு அதில் கூறப்பட்டுள்ளது.

The post கோவை-ராமேஸ்வரம் ரயிலை தினமும் இயக்க வலியுறுத்தல் appeared first on Dinakaran.