துரைப்பாக்கம்: பெருங்குடியில் நண்பர்களுடன் மது அருந்தியபோது ஏற்பட்ட தகராறில், ஆன்லைன் டெலிவரி ஊழியர் அடித்துக்கொலை செய்யப்பட்ட சம்பவம் பரபரப்பை ஏற்படுத்தி உள்ளது. கிழக்கு கடற்கரை சாலை வெட்டுவாங்கேணி, கற்பக விநாயகர் கோயில் நகர் 12வது தெருவை சேர்ந்தவர் அருண்குமார் (25). இவரது நண்பர், கிழக்கு கடற்கரை சாலை, நீலாங்கரை அறிஞர் அண்ணா தெருவை சேர்ந்த விநாயகமூர்த்தி (25). இவர்கள், ஆன்லைன் உணவு டெலிவரி செய்யும் ஊழியர்கள். இவர்கள் இருவரும், சக நண்பர்களுடன் நேற்று முன்தினம் நள்ளிரவு பெருங்குடி, பர்மா காலனி பகுதியில் மது அருந்தியுள்ளனர். அப்போது, போதை தலைக்கேறியதும் நண்பர்களிடையே வாக்குவாதம் ஏற்பட்டு, ஒருவருக்கொருவரை சரமாரியாக தாக்கிக்கொண்டனர். அப்போது, ஆத்திரமடைந்த விநாயகமூர்த்தி, அருண்குமாரை சரமாரியாக தாக்கியதில், அவர் மயங்கி கீழே விழுந்துள்ளார்.

அதிர்ச்சியடைந்த சக நண்பர்கள், உடனடியாக அருண்குமாரை மீட்டு, சிகிச்சைக்காக அருகிலுள்ள தனியார் மருத்துவமனைக்கு அழைத்துச்சென்றனர். அங்கு, அவரை பரிசோதனை செய்த மருத்துவர்கள், அருண்குமார் ஏற்கனவே இறந்துவிட்டதாக தெரிவித்தனர். இதுகுறித்து, மருத்துவமனை சார்பில் துரைப்பாக்கம் போலீசாருக்கு தகவல் தெரிவிக்கப்பட்டது. அதன்பேரில், சம்பவ இடத்திற்கு சென்ற போலீசார், அருண்குமாரின் சடலத்தை கைப்பற்றி பிரேத பரிசோதனைக்காக ராயப்போட்டை அரசு மருத்துவமனைக்கு அனுப்பி வைத்தனர். மேலும், வழக்குப்பதிவு செய்த போலீசார், அருண்குமாரை அடித்துக்கொலை செய்த அவரது நண்பன் விநாயகமூர்த்தியை, கைது செய்து நீதிமன்றத்தில் ஆஜர்படுத்தி சிறையில் அடைத்தனர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

 

The post நண்பர்களுடன் மது அருந்தியபோது தகராறு ஆன்லைன் உணவு டெலிவரி ஊழியர் அடித்துக்கொலை: பெருங்குடியில் பரபரப்பு appeared first on Dinakaran.