சென்னை: விஷமத்தனமான பிரசாரத்தை எதிர்க்கட்சிகள் கையில் எடுக்கிறார்கள். விஷத்தை முறிக்கின்ற மூலிகையை முதல்வர் கையில் எடுத்துள்ளார் என அமைச்சர் சேகர்பாபு கூறினார். திரு.வி.க.நகர் சட்டமன்றத் தொகுதிக்கு உட்பட்ட ஓட்டேரி பகுதியில் 5வது நாளாக நேற்று காலை அமைச்சர் சேகர்பாபு மற்றும் சென்னை மாநகராட்சி மேயர் பிரியா நடைபயணமாக சென்று பொதுமக்களை நேரில் சந்தித்து குறைகளை கேட்டறிந்தனர். பின்னர் செய்தியாளர்களை சந்தித்த மேயர் பிரியா, ‘‘ஒவ்வொரு வார்டுக்கும் நேரில் சென்று பொதுமக்களின் குறைகளை கேட்டு அறிந்து வருகிறோம் அந்த வகையில் இன்றைய தினம் பள்ளிக்கூடம், கோயில், பொது இடங்களில் உள்ள பிரச்னைகள் என்னென்ன என்பது குறித்து பொதுமக்களிடம் நேரில் கேட்டறிந்தோம். வடசென்னையில் தொடங்கி இருக்கக்கூடிய இந்த கள ஆய்வு மத்திய சென்னை, தென்சென்னை பகுதிக்கு உட்பட்ட வார்டுகளிலும் அடுத்தடுத்து மேற்கொள்ள உள்ளோம்’’ என்றார்.
பின்னர் அமைச்சர் சேகர்பாபு கூறுகையில், ‘‘நாங்கள் சுதந்திரமாக வருகிறோம். மக்களோடு ஒன்றிணைந்து இருக்கக்கூடிய கட்சி திமுக. கால் படாத சாலைகளே இல்லை என்ற வகையில் பயணிப்பவர்தான் தமிழக முதல்வர் மு.க.ஸ்டாலின். இறக்குமதி செய்யப்பட்ட தலைவர் அல்ல எங்கள் தலைவர். எப்படிப்பட்ட பிரச்னையாக இருந்தாலும் திறந்த புத்தகமாக இருக்கக்கூடிய திமுகவும் திராவிட மாடல் அரசும் சந்திக்க தயாராக இருக்கிறது. விஷமத்தனமான பிரசாரத்தை எதிர்க்கட்சிகள் கையில் எடுக்கிறார்கள். விஷத்தை முறிக்கின்ற மூலிகையை முதலமைச்சர் கையில் எடுத்துள்ளார். எல்லா சூழ்நிலையிலும் அசாதாரண சூழ்நிலையிலும் சமாளிக்கக்கூடிய ஒருவர்தான் தமிழக முதலமைச்சர்’’ என்றார்.
The post எதிர்க்கட்சிகள் விஷமத்தனமான பிரசாரம் விஷத்தை முறிக்கிற மூலிகையை முதல்வர் கையில் எடுத்துள்ளார்: அமைச்சர் சேகர்பாபு பேட்டி appeared first on Dinakaran.
