திருவனந்தபுரம்: சபரிமலை ஐயப்பன் கோயிலில் பிரசித்தி பெற்ற மண்டல பூஜைக்கு இன்னும் 4 நாட்கள் மட்டுமே உள்ளன. நேற்று 90 ஆயிரத்திற்கும் மேற்பட்டோர் தரிசனம் செய்தனர். கடந்த 19ம் தேதி 96,007 பேரும், 20ம் தேதி (நேற்று முன்தினம்) 96,853 பேரும் தரிசனம் செய்தனர். இந்த 3 நாட்களிலும் உடனடி முன்பதிவு எண்ணிக்கையும் 22 ஆயிரத்தை தாண்டியது. உடனடி முன்பதிவு மூலம் 19ம் தேதி 22,121 பேரும், 20ம் தேதி 22,203 பேரும் தரிசனம் செய்தனர். கடந்த 3 நாட்களில் மட்டும் 2.75 லட்சத்திற்கும் அதிகமான பக்தர்கள் தரிசனம் செய்துள்ளனர் என்பது குறிப்பிடத்தக்கது.

பக்தர்கள் எண்ணிக்கை மிகவும் அதிகரித்த போதிலும் திருவிதாங்கூர் தேவசம் போர்டு மற்றும் கேரள போலீசின் துரித நடவடிக்கைகளினால் கடந்த வருடங்களைப் போல் அல்லாமல் பக்தர்கள் நீண்ட நேரம் காத்திருக்காமல் தரிசனம் செய்து வருகின்றனர். இதற்கிடையே மண்டல பூஜையை முன்னிட்டு பக்தர்கள் இதைவிட அதிகமாக வருவார்கள் என்பதால் நெரிசலை தவிர்ப்பதற்காக வரும் 25, 26 ஆகிய தேதிகளில் தரிசனத்திற்கு கட்டுப்பாடு ஏற்படுத்தப்பட்டுள்ளது. இதன்படி தங்க அங்கி சன்னிதானத்திற்கு வரும் 25ம் தேதி 50 ஆயிரம் பேருக்கும், மண்டல பூஜை தினமான 26ம் தேதி 60 ஆயிரம் பேருக்கும் மட்டுமே ஆன்லைனில் தரிசனத்திற்கு முன்பதிவு செய்ய முடியும். இந்த 2 நாட்களிலும் உடனடி முன்பதிவு 5 ஆயிரமாக குறைக்கப்பட்டுள்ளது.

The post 3 நாளாக 90 ஆயிரம் பக்தர்கள் தரிசனம் சபரிமலையில் டிச.25,26ல் தரிசனத்திற்கு கட்டுப்பாடு appeared first on Dinakaran.