அண்மையில் நியூசிலாந்தின் வட தீவில் கரையை கடந்த வையானு (Vaianu) புயல் காரணமாக அந்நாட்டில் பெரும் வெள்ளப்பெருக்கு மற்றும் மின்வெட்டு ஏற்பட்டதோடு, நூற்றுக்கணக்கானோர் அவர்கள் வசித்த இடத்தை விட்டு வெளியேற வேண்டிய நிலையும் ஏற்பட்டு அவர்களின் வாழ்வாதாரம் மற்றும் இயல்பு வாழ்க்கை பாதிக்கப்பட்டு உள்ளது.
மணிக்கு 130 கி.மீ-க்கும் அதிகமான வேகத்தில் வீசிய புயல் காற்றானது கனமழை மற்றும் பெரிய அலைகளுடன், மகேது தீபகற்பத்திற்கு அருகே கரையைக் கடந்ததாக அந்த நாட்டின் தேசிய வானிலை ஆய்வு மையமான மெட்சர்வீஸ் தகவல் தெரிவித்துள்ளது. மேலும், வையானு புயலை “உயிருக்கு அச்சுறுத்தலான” ஒரு இயற்கை சீற்றம் என்றும் அது விவரித்துள்ளது.
வையானு புயலால் ஏற்பட்ட சேதங்களைச் சீரமைக்கும் பணியின் ஒரு பகுதியாக, இன்று மாநில நெடுஞ்சாலைகள் முழுவதும் நிலச்சரிவுகள், வெள்ளத்தால் ஏற்பட்ட சேதங்கள் மற்றும் சிறு பாலங்களைச் சீரமைக்கும் பணியில் மீட்பு குழுக்கள் ஈடுபட்டுள்ளன.
சாலைகளை பயன்படுத்துவோர் விழிப்புடன் இருக்குமாறும், அவர்கள் செல்லும் இடத்தில் நிலவும் சூழ்நிலைக்கு ஏற்ப வாகனங்களை இயக்குமாறும் அதிகாரிகள் அறிவுறுத்தி உள்ளனர். இதனிடையே இந்தப் புயல் வட தீவின் விளிம்புகளை நோக்கி நகர்ந்ததால், நாட்டின் அதிக மக்கள்தொகை கொண்ட நகரமான ஆக்லாந்து மிக மோசமான பாதிப்புகளிலிருந்து தப்பித்ததாக நியூசிலாந்தின் அவசரநிலை மேலாண்மை அமைச்சர் மார்க் மிட்செல் கூறினார்.
இது குறித்து அறிக்கை வெளியிட்டுள்ள மார்க் மிட்செல் நாங்கள் எத்தகைய தீவிரத்தை எதிர்கொள்ளத் தயாராக இருந்தோமோ அல்லது எத்தகைய தாக்கத்திற்கு ஆளாவோம் என்று எதிர்பார்த்தோமோ, அந்த அளவுத் தீவிரத்தை நல்வாய்ப்பாக முழுமையாக எதிர்கொள்ளவில்லை, கடும் சேதத்திற்கு மத்தியில் இது ஒரு நல்ல செய்தி என்று கூறினார். இதனிடையே சூழல் சீரடைந்து வருவதால், Bay of Plenty உள்ளிட்ட வட தீவுப் பகுதிக்கான பெரும்பாலான வானிலை எச்சரிக்கைகளும் கண்காணிப்பு அறிவிப்புகளும் விலக்கிக் கொள்ளப்பட்டுள்ளன.
மீட்பு மற்றும் சீரமைப்புப் பணிகள் முழுவீச்சில் நடைபெற்று வரும் நிலையில் தற்போதும் சில பகுதிகளில் மின்சார விநியோகம் இன்னும் சீராகவில்லை என்பதோடு, வெள்ளப்பெருக்கு மற்றும் சிதறிக் கிடக்கும் குப்பைக் கழிவுகள் காரணமாக முக்கியச் சாலைகளில் சில இன்னும் மூடப்பட்ட நிலையிலேயே உள்ளதாக அங்கிருந்து வரும் தகவல்கள் தெரிவிக்கின்றன.
