சென்னை: தமிழக சட்டப்பேரவை தேர்தலில் பாஜ நட்சத்திர பேச்சாளர்களாக பிரதமர் மோடி, அமித்ஷா மற்றும் 6 மாநில முதல்வர்கள் பட்டியலை தேர்தல் ஆணையம் வெளியிட்டுள்ளது. தமிழக சட்டப்பேரவை தேர்தலை முன்னிட்டு அரசியல் கட்சிகள் முழு வீச்சில் பிரசாரத்திற்கு தயாராகி வருகின்றன. வாக்காளர்களை நேரடியாக சென்றடையும் வகையில் பெரிய கூட்டங்கள், ரோடு ஷோக்கள், சமூக ஊடக பிரசாரங்கள் உள்ளிட்ட பல்வேறு முறைகளில் பிரசாரங்களை தீவிரப்படுத்தப்பட்டுள்ளன.

வாக்காளர்களை கவரும் வகையில் முக்கிய தலைவர்கள் மற்றும் சினிமா பிரபலங்களை முன்னிறுத்தும் முயற்சியில், நட்சத்திர பேச்சாளர்கள் பட்டியல் முக்கிய இடத்தை பெற்றுள்ளது. இந்திய தேர்தல் ஆணையமும் அனைத்து அரசியல் கட்சிகளும் தங்களது நட்சத்திர பேச்சாளர்களின் பெயர் பட்டியலை முன்கூட்டியே சமர்ப்பிக்க வேண்டும் என்று அறிவுறுத்தியுள்ளது. தேர்தல் ஆணைய விதிகளின்படி, தேசிய மற்றும் மாநில அளவில் அங்கீகரிக்கப்பட்ட கட்சிகள் அதிகபட்சம் 40 பேரையும், அங்கீகாரம் பெறாத கட்சிகள் 20 பேரையும் நட்சத்திர பேச்சாளர்களாக அறிவிக்கலாம்.

இந்த பட்டியலில் இடம் பெறும் பேச்சாளர்கள் மேற்கொள்ளும் பிரசார செலவுகள், அவர்கள் ஆதரிக்கும் வேட்பாளர்களின் தேர்தல் செலவுக்கணக்கில் சேர்க்கப்படாது என்பது குறிப்பிடத்தக்கது. ஆனால், அந்த பேச்சாளர்களின் பயணம் மற்றும் கூட்ட ஏற்பாடுகள் தொடர்பான சில செலவுகள் கட்சியின் கணக்கில் பதிவு செய்யப்பட வேண்டும் என்ற கட்டுப்பாடும் உள்ளது.

அதன்படி, திமுக நட்சத்திர பேச்சாளர்களாக முதல்வர் மு.க.ஸ்டாலின், துணை முதல்வர் உதயநிதி ஸ்டாலின், டி.ஆர்பாலு, கே.என்.நேரு, ஓ.பன்னீர்செல்வம், எம்.பி. கனிமொழி, ஐ.பெரியசாமி, எ.வ.வேலு, தங்கம் தென்னரசு, திருச்சி சிவா, ஆ.ராசா, மதிவதனி உள்ளிட்ட 40 பேர் கொண்ட நட்சத்திர பேச்சாளர்கள் பட்டியலில் இடம் பெற்றுள்ளனர். அதிமுக சார்பில், எடப்பாடி பழனிசாமி, கே.பி.முனுசாமி, விந்தியா, காயத்ரி ரகுராம், நிர்மலா பெரியசாமி உள்ளிட்ட 40 பேர் இடம் பெற்றுள்ளனர்.

தேமுதிக பொதுச்செயலாளர் பிரேமலதா, சுதீஷ், விஜயபிரபாகர், தவெக சார்பில் விஜய் உள்ளிட்ட 20 பேர், மதிமுக சார்பில் வைகோ உள்பட 888 நட்சத்திர பேச்சாளர்கள் பட்டியலை தேர்தல் ஆணையம் நேற்று வரை வெளியிட்டுள்ளது. இதில் பாஜ சார்பில் 40 பேர் கொண்ட நட்சத்திர பேச்சாளர் பட்டியலை நேற்று தேர்தல் ஆணையம் வெளியிட்டுள்ளது. இதில் பிரதமர் நரேந்திர மோடி, ஒன்றிய அமைச்சர்கள் அமித்ஷா, ராஜ்நாத் சிங், நிர்மலா சீதாராமன், நிதின்கட்கரி, பியூஷ் கோயல், எல்.முருகன் மற்றும் நயினார் நாகேந்திரன், அண்ணாமலை, சரத்குமார், குஷ்பு, நமீதா, ஒய்.ஜி.மதுவந்தி ஆகியோருடன் 6 மாநில முதல்வர்களும் இடம் பிடித்துள்ளனர்.

அதன்படி, உ.பி. முதல்வர் யோகி ஆதித்யநாத், ம.பி. முதல்வர் மோகன் யாதவ், மராட்டிய முதல்வர் தேவேந்திர பட்நவிஸ், ராஜஸ்தான் முதல்வர் பஜன்லால் சர்மா, அசாம் முதல்வர் ஹிமந்த் பிஸ்வா சர்மா, டெல்லி முதல்வர் ரேகா குப்தா ஆகிய 40 பேர் இடம் பிடித்துள்ளது குறிப்பிடத்தக்கது.