ஏ.எல்.விஜய் எழுதி இயக்கியுள்ள `காதல் ரீசெட் ரிப்பீட்’ என்ற படம் நாளை திரைக்கு வருகிறது. இந்நிலையில் அவர் அளித்த பேட்டியில், அவரால் அறிமுகமான சாரா அர்ஜூன் பற்றி பேசியிருக்கிறார். அவர் கூறுகையில், ‘சாரா அர்ஜூன் எனது மகளை போன்றவர். அவரது பொன்னான நேரத்தை தனது பெற்றோரைவிட என்னுடன்தான் அதிகமாக செலவிட்டுள்ளார். எல்லா பரீட்சையின் விடுமுறைக்கும் ஒரு உறவினரின் வீட்டுக்கு செல்வது போல், சென்னைக்கு வந்து ஒரு மாதம் தங்குவார். எனது மகள் ‘துரந்தர்’ என்ற இந்தி படத்தின் மிகப்பெரிய வெற்றி மற்றும் வசூலின் மூலம் இந்தியாவின் முன்னணி நடிகைகளில் ஒருவராக மாறி, ஸ்டார் அந்தஸ்து பெற்றிருப்பதை நினைத்து மிகவும் சந்தோஷப்படுகிறேன்.
வாரம் ஒருமுறையாவது அவர் என்னிடம் செல்போனில் பேசிவிடுவார். மேற்கத்திய ஆதிக்கம் நிறைந்த மும்பையில் இருந்து கிளம்பி, கோவை ஈஷா மையத்துக்கு சென்று படித்து, மிகவும் ஒழுக்கமான முறையில் வளர்ந்த பெண் அவர். இப்போது அவரை பார்க்கும்போது எனக்கு பெருமையாகவும், சந்தோஷமாகவும் இருக்கிறது. `துரந்தர்’ படக்குழு சாரா அர்ஜூனை பற்றி என்னிடம் பேசும்போதும், விவாதிக்கும்போதும் எனக்கு பெருமையாக இருக்கும். நான் சாரா அர்ஜூனை அறிமுகப்படுத்தினேன் என்பதைவிட, அவர் எனக்கு ஒரு மகள் என்றுதான் சொல்ல முடியும்.
`துரந்தர்’ படத்தை பார்த்துவிட்டு சாரா அர்ஜூனுக்கு போன் செய்து, `அப்பாவும், அம்மாவும் மிகவும் பெருமையாக நினைப்பார்கள்’ என்று சொன்னேன். `அப்பா, அம்மா மட்டுமா? நீங்களும்தானே பெருமைப்படுவீர்கள்?’ என்று கேட்டார். அதுவே சாரா அர்ஜூனுக்கும், எனக்குமான பாசத்தை சொல்லிவிடும். சாரா அர்ஜூனின் வாழ்க்கை பற்றிய முடிவுகளை அவரது அம்மா, அப்பா, நான் ஆகியோர் சேர்ந்து எடுப்போம். முன்னதாக சாரா அர்ஜூன் அடைந்த உயரத்தைவிட, இன்னும் அதிகமான உயரத்தை நோக்கி செல்ல வேண்டும் என்று நினைத்தோம். அது இப்போது நடந்திருப்பதை நினைத்து மகிழ்ச்சி அடைகிறோம்’ என்றார்.
