திருமணத்தின் போது கணவன் பால்ராஜின் ஆசைப்படி 6 குழந்தைகளை பெற்று தருவதாக வாக்கு கொடுக்கிறார், காயத்ரி ரேமா. ஆனால், ஒரு மகனை மட்டுமே பெற்றெடுக்கிறார். பால்ராஜ் ஆசையுடன் தன்னை நெருங்கும்போது எரிச்சலடைந்து அவரை புறக்கணிக்கிறார். இதனால் இவர்களின் குடும்ப வாழ்க்கை திசை மாறுவதே கதை. எழுதி இயக்கி தயாரித்து கதையின் நாயகனாக நடித்துள்ள பால்ராஜ், கேரக்டருக்கேற்ற நடிப்பை வழங்கியுள்ளார். அவருக்கும், ஸ்வேதாஸ்ரீக்குமான நெருக்கமான காட்சிகள் இளைஞர்களை கவரும். குணச்சித்திர நடிப்பில் காயத்ரி ரேமாவும், கவர்ச்சி நடிப்பில் ஸ்வேதாஸ்ரீயும் அசத்தியுள்ளனர்.
மோகத்தை வெளிப்படுத்தும் ரவிமரியா, வழக்கமான காமெடி வில்லத்தனத்தை வெளிப்படுத்தியுள்ளார். மற்றும் அம்பானி சங்கர், ‘பசங்க’ சிவகுமார் உள்பட பலர் அந்தந்த கேரக்டருக்கு பொருந்தியுள்ளனர். உதயன் ஒளிப்பதிவு நேர்த்தியாக இருக்கிறது. விஜய் பிரபு இசையில் பாடல்கள் புதுவிதமாக ஒலிப்பதிவாகியுள்ளன. சொல்ல வந்த விஷயத்தை தெளிவாக சொல்லியிருக்கிறார், எழுதி இயக்கியுள்ள பால்ராஜ். படத்தின் உருவாக்கத்தில் கூடுதல் கவனம் செலுத்தியிருக்கலாம்.
