பிரவீன் சரவணன் இயக்கத்தில், தி மாபோகோஸ் நிறுவனம் சார்பில் பிரதீப் மகாதேவன் தயாரித்துள்ள படம், ‘முஸ்தபா முஸ்தபா’. கதையின் நாயகனாக சதீஷ் நடித்துள்ளார். எம்.எஸ்.ஜோன்ஸ் ரூபர்ட் இசை அமைத்துள்ளார். நாளை திரைக்கு வரும் இப்படம் குறித்து சதீஷ் கூறுகையில், ‘இது செம ஜாலியான படமாக இருக்கும். ‘முஸ்தபா முஸ்தபா’ என்றாலே அனைவருக்கும் நட்பை பற்றிய பாடல்தான் ஞாபகத்துக்கு வரும். அதை மனதில் வைத்து, நட்புக்கு அதிக முக்கியத்துவம் கொடுத்து கதையை உருவாக்கியுள்ளோம்.
அதனால், உங்கள் நண்பர்களுடன் ஜாலியாக தியேட்டருக்கு வந்து படத்தை பார்த்து ரசிக்கலாம். இப்படத்தை சக்தி பிலிம் பேக்டரி வெளியிடுகிறது. தொடர்ந்து என்னுடன் மூன்று படங்களில் பணியாற்றிய இசை அமைப்பாளர் ஜோன்ஸ் ரூபர்ட்டுக்கு மிகவும் நன்றி. நடிகர்கள் மற்றும் படக்குழுவினர் சிறப்பாக பணியாற்றியுள்ளனர். ஆணும், பெண்ணும் சமம் அல்ல.
ஆண்களை விட பெண்கள் அதிக உயரத்தில் இருக்கின்றனர். பெண்கள் தெய்வத்துக்கு சமம். அதனால், யார் குடித்தாலும் தவறுதான். இதுவரை நான் சிகரெட் புகைத்ததும் இல்லை, மதுவை குடித்ததும் இல்லை. இதை நான் பெருமைக்காக சொல்லவில்லை. நான் சொன்னதை கேட்டு சிலர் திருந்தினால் மிகவும் சந்தோஷப்படுவேன்’ என்றார்.
