திருச்செந்தூர்: திருச்செந்தூர் சுப்பிரமணிய சுவாமி கோயிலில் நடிகர் சூரி, நடிகை ரம்யா பாண்டியன் நேற்று சுவாமி தரிசனம் செய்தனர். திருச்செந்தூர் சுப்பிரமணிய சுவாமி கோயிலில் சுவாமி தரிசனம் செய்வதற்காக நடிகர் சூரி நேற்று காலை வருகை தந்தார். கோயிலில் மூலவர், சண்முகர், வள்ளி தெய்வானை, பெருமாள், தட்சிணாமூர்த்தி மற்றும் சத்ரு சம்ஹார மூர்த்தி ஆகிய சன்னதிகளில் வழிபட்டார். பின்னர் வெளியே வந்த நடிகர் சூரி, நிருபர்களிடம் கூறியதாவது: டிச.20ம்தேதி விடுதலை படத்தின் 2ம் பாகம் வெளியாக உள்ளது. அப்படத்தின் முதல் பாடல் வெளியாகி நல்ல வரவேற்பை பெற்றுள்ளது. உலகத்தின் தலைசிறந்த மனிதர்களில் ஒருவர் இளையராஜா. அவரது பாடல்கள் தற்போதைய இளம் தலைமுறையினரும் கேட்கும் வண்ணம் உள்ளது. நானும் அவரது காலத்தில் நடிகராக இருப்பதை பாக்கியமாக நினைக்கிறேன். அவரது பாடல்கள் வாழ்வியலை உண்மைகளை பிரதிபலிக்கும்.

இளையராஜா ஒரு புத்தகம். எனக்கு காமெடியானாவும், ஹீரோவாகவும் வாய்ப்பு கொடுத்தது மக்கள் தான். தற்போது விலங்கு வெப்சீரியஸ் எடுத்த இயக்குநர் பிரசாந்த் இயக்கும் படத்தில் நடிக்க உள்ளேன். அதைத் தொடர்ந்து பல படங்களில் ஹீரோவாக வாய்ப்பு வந்து கொண்டிருக்கிறது. தொடர்ந்து வெற்றிமாறனின் புதிய படத்திற்கும் வாய்ப்பு வந்துள்ளது. அது குறித்த அறிவிப்பு விரைவில் வரும். நடிகர் சூர்யா நடித்த கங்குவா திரைப்படம் அருமையாக உள்ளது. நன்றாக இல்லை என்பது ஒரு சிலரின் கருத்து. தமிழ் சினிமாவை அடுத்த கட்டத்திற்கு கொண்டு செல்வதற்கான படமாகத்தான் நான் இதை பார்க்கிறேன் என்றார். நயன்தாரா – தனுஷ் பிரச்னை குறித்து கேட்டதற்கு அது தனக்கு தெரியாது என்றும், தெரிந்தாலும் அது அவர்களின் தனிப்பட்ட பிரச்னை என்று கூறி அங்கிருந்து கிளம்பினார்.

முன்னதாக கோயிலில் நடிகர் சூரியிடம் சிறுவன் ஒருவன் நீங்கள் நடித்த டான் திரைப்படத்தை பலமுறை பார்த்தாக கூறினார். அந்த சிறுவனிடம் நடிகர் சூரி, படத்தை மட்டும் பலமுறை பார்த்தால் போதாது. பாடத்தையும் பலமுறை படிக்க வேண்டும். தாய் தந்தை சொல்வதை கேட்டு நடக்க வேண்டும் என அறிவுரை கூறினார். நடிகர் சூரியுடன் கோயில் கடற்கரை பணியாளர்கள், பாதுகாவலர்கள், ஐயப்ப பக்தர்கள், பக்தர்கள் புகைப்படம் மற்றும் செல்பி எடுத்தும், கை கொடுத்தும் மகிழ்ந்தனர். இதேபோல் நடிகை ரம்யா பாண்டியன் தனது கணவருடன் கோயிலில் சுவாமி தரிசனம் செய்தார். அவருடன் பக்தர்கள், பொதுமக்கள் புகைப்படம் எடுத்தும், செல்பி எடுத்தும் மகிழ்ந்தனர். தொடர்ந்து அங்கிருந்த கடைக்கு சென்று பஞ்சாமிர்தம் வாங்கிக் கொண்டு கிளம்பினார். அப்போது தனியார் விடுதி வாசலில் நடிகர் சூரி மற்றும் ரம்யா பாண்டியன் சந்தித்து நலம் விசாரித்துக் கொண்டனர்.

The post திருச்செந்தூர் முருகன் கோயிலில் நடிகர் சூரி, நடிகை ரம்யா பாண்டியன் தரிசனம் appeared first on Dinakaran.