கொல்கத்தா: வேட்பாளர் தேர்வு பிரச்னை தொடர்பாக மேற்குவங்க காங்கிரஸ் அலுவலகத்தில் வன்முறை வெடித்தது. கட்சி தொண்டர்கள் படுகாயம் அடைந்தனர். மேற்குவங்க சட்டப்பேரவை தேர்தலில் மொத்தம் உள்ள 294 தொகுதிகளிலும் காங்கிரஸ் கட்சி தனித்து போட்டியிடுகிறது. இதையடுத்து சட்டப்பேரவை தேர்தலில் போட்டியிடும் காங்கிரஸ் வேட்பாளர்கள் தேர்வு மேற்குவங்க காங்கிரஸ் தலைமை அலுவலகத்தில் நடந்தது. அப்போது திடீரென வன்முறை வெடித்தது. கட்சி தொண்டர்கள் சரமாரியாக தாக்கிக்கொண்டனர். இதில் பலர் காயம் அடைந்தனர்.

மோதலின் போது கம்பியால் தாக்கப்பட்டதில் ஒரு தொண்டருக்கு தலையில் பலத்த காயம் ஏற்பட்டது. இதையடுத்து சில போராட்டக்காரர்கள் சாலையில் அமர்ந்து, கோஷங்களை எழுப்பி, வன்முறையில் ஈடுபட்டவர்களைக் கைது செய்யக் கோரியும் போராட்டத்தில் ஈடுபட்டனர். இளைஞர் காங்கிரஸ் தலைவர் காஷிப் ரெசா இந்த வன்முறையை தூண்டியதாக கட்சித் தொண்டர்களில் ஒரு பிரிவினர் குற்றம் சாட்டியுள்ளனர். தலைமையகத்தில் கட்சித் தொண்டர்களைத் தாக்கிய ஆதரவாளர்களை ரெசா அனுப்பியதாக அவர்கள் குற்றம் சாட்டினர்.

இந்த மோதல்களின் போது பெண் கட்சித் தொண்டர்கள் மீது முறைகேடாக நடந்து கொண்டதாகவும் குற்றச்சாட்டுகள் எழுந்தன. கைகலப்பின் போது ஒரு பெண் தொண்டர் மயங்கி விழுந்ததாக கூறப்படுகிறது. காவல்துறையினர் இருந்தபோதிலும், பாதுகாப்புப் படையினரின் முன்னிலையில் மோதல்களும் வாக்குவாதங்களும் தொடர்ந்ததால், நிலைமை பதட்டமாகவே இருந்தது. பூர்வ பர்தமான் மாவட்டத்தில் ஆத்திரமடைந்த தொண்டர்கள் கட்சி அலுவலகங்களைச் சூறையாடியதுடன், மாவட்ட காங்கிரஸ் அலுவலகத்தின் பூட்டுகளையும் உடைத்தனர். பலகட்டாவில் வட்டார காங்கிரஸ் அலுவலகத்தை தொண்டர்கள் சூறையாடியதாக தகவல்கள்வெளியாகி உள்ளன.

* முதல்வர் மம்தா ஹெலிகாப்டர் தரையிறங்க முடியாமல் தவிப்பு
கொல்கத்தா: மேற்கு வங்க முதல்வர் மம்தா பானர்ஜியின் தேர்தல் பிரச்சாரப் பயணத்தின்போது, ​​திடீரென ஏற்பட்ட இடியுடன் கூடிய மழையின் காரணமாக, முர்ஷிதாபாத் மாவட்டத்தில் உள்ள நபாகிராமத்தில் அவரது ஹெலிகாப்டர் தரையிறங்க முடியவில்லை என்று அதிகாரிகள் தெரிவித்தனர். பிற்பகல் 2.10 மணியளவில் அப்பகுதியைச் சூறாவளி போன்ற பலத்த காற்றுடன் கூடிய இடியுடன் கூடிய மழை தாக்கியதால், ஹெலிகாப்டர் மீண்டும் அவர் புறப்பட்ட பர்துவானுக்கே திரும்ப வேண்டிய கட்டாயம் ஏற்பட்டது என்று அதிகாரி ஒருவர் தெரிவித்தார். அதே சமயம் பர்வானுக்குத் திரும்பிய பிறகு, பானர்ஜி சாலை மார்க்கமாக நபாகிராமத்திற்குப் புறப்பட்டுச் சென்றார்.