புதுடெல்லி: இந்தியா – அமெரிக்கா வர்த்தக ஒப்பந்த விவகாரத்தில் இன்னும் குழப்பங்கள் நீடிக்கும் நிலையில், இந்த வர்த்தக ஒப்பந்தம் குறித்து காங்கிரஸ் பொதுசெயலாளர் ஜெய்ராம் ரமேஷ் பல்வேறு குற்றச்சாட்டுகளை முன்வைத்துள்ளார். காங்கிரஸ் பொதுசெயலாளர் ஜெய்ராம் ரமேஷ் தன் எக்ஸ் பதிவில், “பிப்ரவரி 2ம் தேதி, இந்தியா, அமெரிக்கா வர்த்தக ஒப்பந்தம் பற்றி அறிவிக்க டிரம்ப்பை கட்டாயப்படுத்த வேண்டிய அவசியம் பிரதமர் மோடிக்கு ஏன் ஏற்பட்டது? அன்றைய தினம் என்ன நடந்தது? அமெரிக்க உச்ச நீதிமன்றம், உலக நாடுகள் மீதான வரி விதிப்பு விவகாரத்தில் டிரம்ப்புக்கு எதிராக தீர்ப்பு தரலாம் என தெரிந்திருந்தும் அவசர, அவசரமாக ஏன் ஒப்பந்தம் செய்தீர்கள்?” என கேள்வி எழுப்பி உள்ளார்.
மேலும், “தற்போது செய்யப்பட்டுள்ள வர்த்தக ஒப்பந்தம் இது இந்திய விவசாயிகளின் நலன்களுக்கு பாதகமானது, அமெரிக்க விவசாயிகளுக்கு சாதகமானது. வர்த்தக ஒப்பந்தம் என்பது கொடுக்கல், வாங்கலாகவே இருக்க வேண்டும். அமெரிக்காவுடனான வர்த்தக ஒப்பந்தம் மூலம் அமெரிக்காவுக்கு வரி கொடுக்க மட்டுமே இந்தியா முடிவு செய்துள்ளது. ஆனால், அமெரிக்கா நமக்கு வரி தராது. எனவே, இந்த வர்த்தக ஒப்பந்தத்தை உடனடியாக கைவிட வேண்டும்” என தெரிவித்துள்ளார்.
