தேர்தல் திருவிழா துவங்கி விட்டாலே, பலதரப்பட்ட தொழில்களும், தொழிலாளர்களும் பிசியாகிவிடுவர். அச்சகங்கள் துவங்கி பொன்னாடை, பூமாலை, கொடி தோரணங்கள் மட்டுமல்லாது மைக்செட், மேடை அமைப்பாளர், உணவகங்கள், வாகனங்கள் வரையிலும் அத்தனை பேருக்கும் தொழில் வாய்ப்புகள் கிடைக்கும்.

இவ்வரிசையில் போட்டோ, வீடியோ கேமராமேன்களுக்கு இந்த தேர்தலில் இன்னும் கிராக்கி எகிறுகிறது. இப்போதே அரசியல்வாதிகள் பிரசாரங்களை, பேட்டிகளை, பொதுக்கூட்டங்களை, நலத்திட்டங்களை அதிகரித்துள்ள நிலையில், இவற்றையெல்லாம் படம்பிடிக்க போட்டோ, வீடியோகிராபர்களை குறிப்பிட்ட கட்சியினர் ஒப்பந்தம் செய்து முடித்திருக்கின்றனர்.

இத்தோடு தேர்தல் அறிவித்த அடுத்த கணமே ஒவ்வொரு நிகழ்வையும் பதிவு செய்திடும் வகையில் தேர்தல், வருவாய் பிரிவுகள், போலீசார் போன்றோருக்கும் இந்த வீடியோகிராபர்கள் அத்தியாவசியம் என்பதால் அந்தந்த துறை அதிகாரிகளும் கூட ஸ்டூடியோகாரர்கள் மட்டுமல்லாது, ஈவென்ட் அமைப்புகளையும் அணுகி இப்போதே போட்டோ, வீடியோகிராபர்களை பணியமர்த்திட பேசி வைத்திருக்கின்றனர்.

இத்துடன் போட்டியிடும் வேட்பாளர்கள் பெயர், சின்னம் மட்டுமே கடந்த 1951ல் நடந்த முதல் தேர்தல் காலத்தில் ஓட்டுச்சீட்டில் இருந்தன. மின்னணு வாக்குப்பதிவு இயந்திரம் வந்தபோதும் இதேநிலைதான் நீடித்தது. இந்நிலையில் 2016ல் நடந்த தமிழக சட்டமன்ற தேர்தலில் வேட்பாளர் பட்டியலில் பெயர், சின்னத்துடன் வேட்பாளர் புகைப்படமும் முதன்முதலில் இடம் பெற்றது. மின்னணு வாக்கு இயந்திரத்திலும், தபால் ஓட்டுகளிலும் வேட்பாளரின் புகைப்படத்துடன் கூடிய பட்டியல் பொறிக்கப்பட்டன.

இதனைத்தொடர்ந்து அடுத்தடுத்த பாராளுமன்ற, சட்டமன்ற தேர்தல்களில் இது தொடர்கிறது. இவ்வகையில், வாக்காளர்கள் வேட்பாளரின் முகம் பார்த்து ஓட்டளிப்பதால், விதவிதமான கைகூப்பிய வணக்கங்களுடன், போஸ் கொடுத்து இயந்திரம், வாக்குச்சீட்டுகளில் மட்டுமல்லாது போஸ்டர்கள் அச்சடிக்கவும் வசதியாக போட்டோக்களை தயாரிப்பதில் வேட்பாளர்களும், வேட்பாளர் ஆசை கொண்டிருப்போரும் அதீத ஆர்வம் காட்டுகின்றனர். இவர்களும் போட்டோ, வீடியோகிராபர்களையே நாடுவதால் போட்டோ, வீடியோ எடுப்பவர்களுக்கு ‘மவுசு’ பல மடங்குக்கு எகிறி நிற்கிறது.