தமிழக அரசியலில் அரை நூற்றாண்டு காலமாகத் திராவிட சித்தாந்தங்கள் கோலோச்சி வரும் நிலையில், கடந்த ஒரு தசாப்தமாகத் தேசியக் கட்சியான பாரதிய ஜனதாவின் மிரட்டல் அரசியல் ஒரு புதிய விவாதத்தை உருவாக்கியுள்ளது. குறிப்பாக, பாஜவுடன் கூட்டணி அமைக்கும் மாநிலக் கட்சிகள் தங்களது தனித்துவமான அடையாளத்தை இழந்து, மெல்ல மெல்ல ‘கரைந்து’ போகின்றனவா? என்ற கேள்வி அரசியல் அரங்கில் பலமாக எழுப்பப்படுகிறது. சிறு கட்சிகள் தங்களது செல்வாக்கை இழப்பதற்கு முதன்மை காரணமாகப் பார்க்கப்படுவது ‘சின்னம்’ அரசியல்.

கடந்த தேர்தல்களில் இந்திய ஜனநாயகக் கட்சி மற்றும் புதிய நீதி கட்சி போன்ற கட்சிகள் பாஜவின் ‘தாமரை’ சின்னத்திலேயே போட்டியிட்டன. தேர்தல் ஆணையத்தின் விதிகளின்படி, ஒரு கட்சி மற்றொரு கட்சியின் சின்னத்தில் போட்டியிடும் போது அதன் வாக்குகள் அனைத்தும் முதன்மைக் கட்சியையே சாரும். இது அந்தச் சிறிய கட்சிகளின் மாநில அங்கீகாரத்தைப் பறிப்பதோடு, வாக்காளர்களின் மனதிலிருந்து அக்கட்சியின் தனித்துவமான அடையாளத்தையும் மெல்ல மறைத்து விடுகிறது.

தமிழகத்தின் மிகப்பெரிய இயக்கமான அதிமுக, 2019 மற்றும் 2021 தேர்தல்களில் பாஜவுடன் கைகோர்த்தது. இந்த காலகட்டத்தில் அதிமுகவின் பாரம்பரிய வாக்கு வங்கியில் ஒரு பகுதி, குறிப்பாக நகர்ப்புற மற்றும் நடுத்தர வர்க்க வாக்குகள், பாஜவை நோக்கி நகர்ந்ததாக அரசியல் தரவுகள் சுட்டிக்காட்டுகின்றன. 2024 மக்களவைத் தேர்தலில் பாஜவின் வாக்கு சதவீதம் 11%-ஐ தாண்டிய நிலையில், அதிமுக பல இடங்களில் மூன்றாவது இடத்திற்குத் தள்ளப்பட்டது. ‘அசல் இருக்கும் போது நகல் எதற்கு?’ என்ற மனநிலைக்குத் தொண்டர்கள் தள்ளப்படுவதே மாநிலக் கட்சிகளின் வீழ்ச்சிக்குத் தொடக்கமாக அமைகிறது.

தமிழக அரசியல் களம் எப்போதும் சமூக நீதி மற்றும் மாநில சுயாட்சியை மையமாகக் கொண்டது. பாஜவின் ‘ஒரே நாடு, ஒரே தேர்தல்’ மற்றும் இந்துத்துவக் கொள்கைகள் மாநிலக் கட்சிகளின் அடிப்படை சித்தாந்தத்தோடு முரண்படும் போது, அக்கட்சிகளின் உறுதிமிக்க சிறுபான்மையின வாக்குகள் மற்றும் நடுநிலை வாக்காளர்கள் அப்படியே மாற்று அணிக்கு (திமுக கூட்டணிக்கு) இடம் பெயர்கின்றனர். இந்த இடைவெளியை பாஜவின் வாக்குகள் ஈடுகட்டத் தவறுவதால், மாநிலக் கட்சிகள் தேர்தல் களத்தில் பலவீனமடைகின்றன.

இதற்கு மிகச்சிறந்த உதாரணமாகத் திகழ்வது சரத்குமாரின் அகில இந்திய சமத்துவ மக்கள் கட்சி. 17 ஆண்டுகால அரசியல் பயணத்தை முடித்துக்கொண்டு அவர் தனது கட்சியை பாஜவுடன் இணைத்தார். அதேபோல், இரண்டாம் கட்டத் தலைவர்கள் தங்களது அரசியல் பாதுகாப்பிற்காக மாநிலக் கட்சிகளை விட்டு வெளியேறி நேரடியாக பாஜவில் இணைவது, மாநிலக் கட்சிகளின் கட்டமைப்பையே சிதைத்து வருகிறது. தற்போது 2026 சட்டமன்றத் தேர்தலுக்காக அதிமுக, பாஜ, பாமக, அமமுக உள்ளிட்ட கட்சிகள் ஒரு மெகா கூட்டணியை உருவாக்கியுள்ளன. எடப்பாடி பழனிசாமி தலைமையிலான இக்கூட்டணி, திமுகவை வீழ்த்த வியூகம் வகுத்தாலும், கூட்டணிக் கட்சிகள் தங்களது தனித்துவத்தைப் பாதுகாத்துக் கொள்ளுமா? என்பது மில்லியன் டாலர் கேள்வியாக உள்ளது.

‘மாநிலக் கட்சிகள் தங்களது அடிப்படை கொள்கைகளில் சமரசம் செய்து கொண்டு தேசியக் கட்சிகளின் நிழலில் தஞ்சமடையும் போது, அவை தங்களது பேரம் பேசும் சக்தியை இழக்கின்றன. இது நீண்டகால அடிப்படையில் தமிழகத்தில் இரு கட்சி முறைக்கு (திமுக மற்றும் பாஜக) வழிவகுக்கலாம்’ என்கின்றனர் அரசியல் ஆய்வாளர்கள். வரப்போகும் 2026 தேர்தல் முடிவுகள், தமிழகத்தில் மாநிலக் கட்சிகளின் இருப்பு நீடிக்குமா அல்லது தேசிய அரசியலின் நீரோட்டத்தில் அவை கரைந்து போகுமா என்பதைத் தீர்மானிக்கும் முக்கியப் புள்ளியாக அமையும்.

பாஜ கூட்டணியால் பின்னடைவை சந்தித்த கட்சிகள்…!
* அதிமுக
2019 மற்றும் 2021 தேர்தல்களில் பாஜவுடன் கூட்டணி அமைத்த பிறகு, அதிமுகவின் வாக்கு வங்கி கணிசமாகக் குறைந்ததாகத் தரவுகள் தெரிவிக்கின் றன. குறிப்பாக, 2024 மக்களவைத் தேர்தலில் அதிமுக பல தொகுதிகளில் மூன்றாவது இடத்திற்குத் தள்ளப்பட்டது. பாஜவின் வளர்ச்சி அதிமுகவின் பாரம்பரிய வாக்கு வங்கியில் ஊடுருவியதாகக் கருதப்படுகிறது. இதன் காரணமாகவே 2023-ல் அதிமுக கூட்டணியிலிருந்து வெளியேறியது. இருப்பினும் தற்போது மீண்டும் இணைந்துள்ளது.

* பாமக
வட தமிழகத்தில் வலுவான வாக்கு வங்கியைக் கொண்டிருந்த பாமக, பாஜ தலைமையிலான கூட்டணியில் இணைந்த பிறகு அதன் செல்வாக்கு சரிவைச் சந்தித்துள்ளது. 2021 சட்டமன்றத் தேர்தலில் 23 இடங்களில் போட்டியிட்டு 5 இடங்களில் மட்டுமே வெற்றி பெற்றது. தற்போது 2026 தேர்தலுக்காக மீண்டும் கூட்டணியில் இணைந்துள்ள போதிலும், அக்கட்சியின் தந்தை-மகன் என்ற உள்முகப் பிரிவினையும் சவாலாக உள்ளது.

* தேமுதிக
ஒரு காலத்தில் தமிழகத்தின் 3வது பெரிய சக்தியாக உருவெடுத்த தேமுதிக, 2014 மக்களவைத் தேர்தலுக்குப் பிறகு பாஜ மற்றும் அதிமுக கூட்டணிகளில் மாறி மாறிப் பயணித்த நிலையில், தற்போது தனது அங்கீகரிக்கப்பட்ட மாநிலக் கட்சி என்ற அந்தஸ்தைத் தக்கவைக்கப் போராடி வருகிறது.

* புதிய நீதி கட்சி
ஏ.சி. சண்முகம் தலைமையிலான இக்கட்சி, முதலியார் சமூக வாக்குகளை மையமாகக் கொண்டது. பல ஆண்டுகளாக பாஜ அல்லது அதிமுக கூட்டணியில் இருக்கும் இக்கட்சி, கடந்த தேர்தல்களில் தனது வேட்பாளர்களைப் பெரிய கட்சிகளின் சின்னத்திலேயே போட்டியிட வைத்துள்ளது. இது அக்கட்சியின் தனித்துவமான தேர்தல் அடையாளத்தை வலுவிழக்கச் செய்துள்ளது.

* மதிமுக
2014 மக்களவைத் தேர்தலில் பாஜ தலைமையிலான தேசிய ஜனநாயகக் கூட்டணியில் அங்கம் வகித்த மதிமுக, அத்தேர்தலில் ஒரு இடத்தைக் கூட வெல்ல முடியாமல் போனது. பின்னர் கொள்கை முரண்பாடுகள் காரணமாக அக்கூட்டணியிலிருந்து வெளியேறியது.

* அமமுக
2019 தேர்தலில் சுமார் 5% வாக்குகளைப் பெற்று அதிமுகவின் வெற்றி வாய்ப்பைப் பாதித்த டிடிவி தினகரனின் அமமுக, 2024 மக்களவைத் தேர்தலில் கடும் சரிவைச் சந்தித்தது. பாஜ கூட்டணியில் 2 இடங்களில் போட்டியிட்ட அக்கட்சிக்குத் தற்போதைய வாக்கு வங்கி செல்வாக்கு மிகவும் குறைவாகவே உள்ளது.

* தமிழக மக்கள் முன்னேற்றக் கழகம்
ஜான் பாண்டியன் தலைமையிலான இக்கட்சி தேவேந்திர குல வேளாளர் சமூகத்தின் ஒரு பகுதி வாக்குகளைப் பெற்றிருந்தாலும், கடந்த சில தேர்தல்களில் இக்கட்சியால் எந்தவொரு சட்டமன்ற அல்லது நாடாளுமன்றத் தொகுதியிலும் வெற்றி பெற இயலவில்லை.

* தமிழ் மாநில காங்கிரஸ்
ஜி.கே.வாசன் தலைமையிலான இக்கட்சி, ஒரு காலத்தில் தமிழகத்தின் தவிர்க்க முடியாத சக்தியாக இருந்தது. ஆனால், 2014ல் காங்கிரஸிலிருந்து பிரிந்த பிறகு நடந்த எந்தவொரு தேர்தலிலும் இக்கட்சி தனித்து நின்று குறிப்பிடத்தக்க வெற்றியைப் பெறவில்லை. 2024 மக்களவைத் தேர்தலில் பாஜ கூட்டணியில் 3 இடங்களில் போட்டியிட்ட போதிலும், அனைத்திலும் தோல்வியைத் தழுவியது.

* இந்திய ஜனநாயகக் கட்சி
பாரிவேந்தர் தலைமையிலான இக்கட்சி, பெரம்பலூர் மற்றும் அதன் சுற்றுவட்டாரப் பகுதிகளில் செல்வாக்கு பெற்றிருந்தது. இருப்பினும், 2024 தேர்தலில் பாஜகவின் ‘தாமரை’ சின்னத்தில் போட்டியிட்டும் இக்கட்சியால் வெற்றி பெற முடியவில்லை. தற்போது இக்கட்சியின் வாக்கு வங்கி 0.5% என்ற அளவிற்குக் குறைந்துள்ளதாகத் தரவுகள் காட்டுகின்றன.