சென்னை: கூட்டணிக்கு நான் தான் தலைமை என்று எடப்பாடி கூறி வரும் வேளையில், கூட்டணியில் புதிய கட்சிகளை இணைக்க அதிரடியாக பாஜ சார்பில் ஒரு குழு அமைக்கப்பட்டுள்ளது. இது அதிமுக தொண்டர்களுக்கு கடும் அதிர்ச்சியை ஏற்படுத்தியுள்ளது. தமிழக சட்டசபை தேர்தலையொட்டி அதிமுக தலைமையிலான அணியில் பாஜ இடம் பெற்றுள்ளது. அதுவும் நிர்பந்த கூட்டணியாக தான் பார்க்கப்பட்டு வருகிறது. கூட்டணிக்கு அதிமுக பொதுச்செயலாளர் எடப்பாடி பழனிசாமி தான் தலைமை வகிக்கிறார்.

அவருக்கு ஃபேஸ் வேல்யூ இருப்பதால், அவர் தான் கூட்டணிக்கு தலைமை என்று பாஜ அறிவித்துள்ளது. எந்த இடத்திலும் பாஜ தலைவர்களோ, அடிக்கடி தமிழகம் வர தொடங்கியுள்ள பிரதமர் மோடி, உள்துறை அமைச்சர் அமித்ஷாவோ முதல்வர் வேட்பாளர் எடப்பாடி என்று சொல்லவில்லை. என்டிஏ கூட்டணி ஆட்சி அமைக்கும் என்று மட்டும் கூறி வருகின்றனர். பொதுக்கூட்டத்தில் கூட அவர் தான் முதல்வர் வேட்பாளர் என்பதை அவர்கள் வெளிப்படையாக அறிவிக்க மறுத்து வருகின்றனர்.

இப்படி நிலைமை இருக்கும் சூழ்நிலையில் கூட்டணி உள்பட அனைத்து விவகாரத்திலும் பாஜவின் கைதான் ஓங்கி இருக்கிறது. அந்த வகையில் தான் அண்மையில் பாமகவுடன் (அன்புமணி அணி) பேச்சுவார்த்தை நடத்தி கூட்டணிக்குள் இணைத்தது பாஜ. தொடர்ந்து டிடிவி. தினகரனும் இணைந்தார். அவரும் பாஜ வாயிலாக தான் கூட்டணியில் இணைந்தார். கூட்டணியில் சேர்த்தது வரை பாஜ தான் களத்தில் இறங்கி செயல்பட்டது. அந்த வகையில் தான் டிடிவி. தினகரன் டெல்லி சென்று கூட்டணியை முடிவு செய்தார்.

பெயரளவுக்கு மட்டும் டிடிவி தினகரன் கூட்டணியில் இணையும் நிகழ்ச்சியில் எடப்பாடி இருந்தார். தொடர்ந்து எடப்பாடியும், டிடிவியும் ஒப்புக்கு, இணைந்தது தொடர்பாக ஒரு பேட்டியை மட்டும் கொடுத்தனர். ஆனால், கூட்டணியை உறுதி செய்வது என்பதில் தொடர்ந்து பாஜ தான் செயல்பட்டு வருகிறது. அந்த வகையில் தேமுதிக, பாமக(ராமதாஸ்) அணியுடன் பேச்சுவார்த்தையை மறைமுகமாக நடத்தி வருகின்றது.

மிகப்பெரும் வலிமையான கூட்டணியை அதிமுக தலைமையில் அமைப்போம் என எடப்பாடி சொன்னாலும், கூட்டணியை இறுதி செய்வதில் டெல்லி பாஜ மேலிடத்தின் கை தான் ஓங்கி இருந்து வருகிறது. இது அதிமுகவிற்கு பின்னடைவாகவே அமைந்துள்ளது. சட்டமன்ற தேர்தல் என்றாலே சென்னை ராயப்பேட்டை அவ்வை சண்முகம் சாலையில் உள்ள அதிமுக அலுவலகமும், போயஸ் கார்டன் இல்லத்திலும் தான் கூட்டணி பேச்சுவார்த்தை நடக்கும். ஆனால் தற்போது பாஜவே தலைமை தாங்கி ஓட்டலில் கூட்டணி குறித்து பேச்சுவார்த்தையை நடத்தி வருகிறது.

இதை பார்த்து அதிமுக தொண்டர்கள் எப்படி இருந்த நாம் இப்படி ஆகிவிட்டோமே என்று நொந்து போய் வருகின்றனர். தேசிய ஜனநாயக கூட்டணிக்கு தலைமை அதிமுக தான் என்று எடப்பாடி கூறி வரும் நிலையில், புதிதாக கட்சிகள் இந்த கூட்டணியில் இணைவது தொடர்பாக பேச்சுவார்த்தை நடத்த பாஜ சார்பில் அதிகாரப்பூர்வ குழுவை ஒன்றை அமைத்து பாஜ மேலும் அதிர்ச்சியை அதிமுகவுக்கு ஏற்படுத்தியுள்ளது.

இது தொடர்பாக தமிழக பாஜ தலைவர் நயினார் நாகேந்திரன் நேற்று வெளியிட்ட அறிவிப்பு: வருகின்ற சட்டமன்ற தேர்தல்-2026ஐ சிறப்பாக எதிர்கொண்டு, மகத்தான வெற்றியினை பெற்றிடும் வகையில் தேசிய ஜனநாயக கூட்டணியில் மேலும் பல அமைப்புகள் இணைய விருப்பம் தெரிவித்துள்ளன. இந்த நிலையில் அமைப்பு தலைவர்கள் மற்றும் பேச்சுவார்த்தை நடத்தி, தேசிய ஜனநாயக கூட்டணிக்கு வலுசேர்த்திட, பாஜ சார்பில் மாநில குழு அமைக்கப்படுகிறது.

அந்த குழுவின் தலைவராக மாநில துணை தலைவர் வி.பி.துரைசாமி, துணை தலைவராக முன்னாள் டிஜிபியும் மாநில செயற்குழு உறுப்பினருமான ஜி.பாலச்சந்திரன் ஆகியோர் நியமிக்கப்படுகிறார்கள். இவ்வாறு அதில் கூறப்பட்டுள்ளது. டிடிவியை கூட்டணியில் இணைக்கவே மாட்டேன் என்று எடப்பாடி பிடிவாதமாக இருந்து வந்தார்.

கடைசி நேரத்தில் பாஜவின் அழுத்ததால் கூட்டணியில் டிடிவி இணைந்துள்ளார். அவர் இணைந்ததை அதிமுகவில் உள்ள சில தலைவர்கள், தொண்டர்கள் இன்று வரை ஏற்றுக்கொள்ளவே இல்லை. கூட்டணியில் இணைந்தாலும் அதிமுக, அமமுக தொண்டர்கள் தொடர்ந்து எதிரிக்கட்சி மாதிரியே இருந்து வருகிறார்கள் என்பது குறிப்பிடத்தக்கது. இப்போது கூட்டணியை உருவாக்க பாஜ குழு அமைத்துள்ளது அதிமுக தொண்டர்களிடம் கடும் அதிருப்தியை ஏற்படுத்தியுள்ளது.

* மிகப்பெரும் வலிமையான கூட்டணியை அதிமுக தலைமையில் அமைப்போம் என எடப்பாடி கூறிவருகிறார்.

* ஆனால், கூட்டணியை இறுதி செய்வதில் டெல்லி பாஜ மேலிடத்தின் கை தான் ஓங்கி இருக்கிறது.

* எந்த இடத்திலும் பாஜ தலைவர்களோ, அடிக்கடி தமிழகம் வர தொடங்கியுள்ள பிரதமர் மோடி, உள்துறை அமித்ஷாவோ முதல்வர் வேட்பாளர் எடப்பாடி என்று சொல்லவில்லை.