சென்னை: கடந்த 2025ம் ஆண்டில் 275 திரைப்படங்கள் வெளிவந்தன. அவற்றில் 10 படங்கள் மட்டுமே லாபரகமான படங்களாக அமைந்தது. இந்த ஆண்டு தமிழ் சினிமாவுக்கு சிறப்பான ஆண்டாக அமையும் என்று எதிர்பார்க்கப்பட்டது. ஆனால், 2026ம் ஆண்டில் முடிந்துள்ள ஜனவரி, பிப்ரவரி, மார்ச் ஆகிய 3 மாதங்களில் 60 திரைப்படங்கள் வெளியாகியுள்ளது. அதில் 5 படங்கள் மட்டுமே லாபகரமான படமாக அமைந்துள்ளது. ஜனவரியில் 21 படங்கள், வெற்றி 2: ஜனவரி பொங்கல் சிறப்பாக வெளியான ‘பராசக்தி’ என்ற படம் வெளியானது. டான் பிக்சர்ஸ் சார்பில் ஆகாஷ் பாஸ்கரன் தயாரித்து சுதா கொங்கரா இயக்கிய இப்படத்தில் சிவகார்த்திகேயன், ரவி மோகன், அதர்வா, லீலா உள்பட பலர் நடித்திருந்தனர். இந்தி திணிப்பு போரட்டத்தை மையமாக வைத்து உருவான இப்படம் ரூ.100 கோடிக்கு மேல் வசூலித்து இந்த ஆண்டின் முதல் பிளாக் பஸ்டர் படமாக அமைந்தது. அதேபோல நிதிஷ் சஹாதேவ் என்பவர் இயக்கத்தில் ஜீவா, பிரார்த்தனா நாதன் ஆகியோர் நடிப்பில் வெளியான ‘தலைவர் தம்பி தலைமையில்’ என்ற படம் குறைந்த செலவில் உருவாகி அதன் கதைக்களத்தால் பி மற்றும் சி சென்டரில் நல்ல வரவேற்பை பெற்றது. தொடர்ந்து ‘அனந்தா’, கார்த்தி நடித்த ‘வா வாத்தியார்’, ‘திரௌபதி 2’, விக்னேஷ் கார்த்திக் இயக்கிய ‘ஹாட்ஸ்பாட் 2 மச்’, ‘ஜாக்கி’, ‘மாயபிம்பம்’, ‘வங்காள விரிகுடா’, ‘லாக்டவுன்’ உள்பட 21 படங்கள் வெளியானது. அவற்றில் ‘பராசக்தி’ படத்தை தவிர மற்ற எந்த படங்களும் பெரிய வெற்றியை பெறவில்லை.

பிப்ரவரியில் 20 படங்கள், வெற்றி 2: கடந்த ஆண்டு ‘டூரிஸ்ட் ஃபேமிலி’ என்ற ஃபேமிலி என்டர்டைன்மெண்ட் படத்தின் மூலம் இயக்குனராக அறிமுகமான அபிஷன் ஜீவிந்த் இந்த ஆண்டு ‘வித் லவ்’ என்ற படத்தின் மூலம் ஹீரோவானார். மதன் என்ற அறிமுக இயக்குனர் டைரக்ட் செய்த அப்படத்திற்கு ஷான் ரோல்டன் இசை அமைத்திருந்தார். இளைஞர்கள் மத்தியில் நல்ல வரவேற்பை பெற்றது. குறைந்த செலவில் உருவாக்கப்பட்ட அப்படம் ரூ.35 முதல் ரூ.40 கோடி ரூபாய் வரை வசூலித்தது. பிப்ரவரி மாதத்தில் முதல் வெற்றியை பதிவு செய்தது.எஸ்கே புரொடக்சன்ஸ் சார்பில் நடிகர் சிவகார்த்திகேயன் தயாரிப்பில் அறிமுக இயக்குனர் சிவக்குமார் முருகேசன் இயக்கத்தில் ராதிகா நடிப்பில் வெளியான ‘தாய் கிழவி’ என்ற படம் வெளியானது. கதை மற்றும் ராதிகாவின் அட்டகாசமான நடிப்பால் அப்படம் இந்த ஆண்டின் மிகப்பெரிய வெற்றிப்படமாக அமைந்தது. ரூ.10 முதல் ரூ.12 கோடி பட்ஜெட்டில் உருவான ‘தாய் கிழவி’ படம் உலகளவில் ரூ.80 கோடிக்கும் அதிகமாக வசூலித்து தயாரிப்பாளருக்கு அதிக லாபத்தை தந்தது.

மேலும், ‘ரெட் லேபிள்’, நீண்ட நாள் கிடப்பில் இருந்து வெளியான ‘யோகி டா’, ‘மை லார்ட்’, ‘மைலாஞ்சி’, ‘லைக்கி தி சூப்பர் ஸ்டார்’, ‘ஃபோர்த் ஃபிளோர்’, ‘ஆழி’ என 20 படங்கள் வெளியானது. அதில் ராஜுமுருகன் இயக்கத்தில் சசிகுமார் நடித்த ‘மை லார்ட்’ என்ற படம் மட்டும் விமர்சன ரீதியாக நல்ல வரவேற்பை பெற்றது. மற்ற எந்த படங்களும் சொல்லிக்கொள்ளும் அளவுக்கு வெற்றியையோ, லாபத்தையோ ஏற்படுத்தவில்லை.
மார்ச் மாதம் 19 படங்கள், வெற்றி 1: கடந்த மாதம் ரச்சிதா மகாலட்சுமி நடிப்பில் ‘99/66’, ஏ.எல்.விஜய் இயக்கிய ‘காதல் ரீசெட் ரிப்பீட்’, விமல் நடித்த ‘வடம்’, பிரியங்கா மோகன் நடித்த ‘மேட் இன் கொரியா’, வித்தியாசமான கதைக்களத்தில் உருவான ‘கெணத்த காணோம்’, ‘வெஞ்ஸ்சன்ஸ்’, ‘வவ்வல்ஸ்’ என 19 படங்கள் திரைக்கு வந்தன. இதில் கென் கருணாஸ் இயக்கி, ஹீரோவாக நடித்த ‘யூத்’ என்ற படம் மட்டுமே வெற்றிபெற்றது.