மலையாளத்தில் பஹத் பாசில் நடிப்பில் வெளியான ‘கும்பளாங்கி நைட்ஸ்’ என்ற படத்தில் அறிமுகமானவர், அன்னா பென். பிறகு அவர் நடித்த ‘ஹெலன்’ என்ற படம் அவரை பிரபலமாக்கியது. இப்படம் தமிழ், இந்தி ஆகிய மொழிகளில் ரீமேக் செய்யப்பட்டது. கடந்த 2024ல் சூரி நடிப்பில் வெளியான ‘கொட்டுக்காளி’ என்ற படத்தின் மூலம் அன்னா பென் தமிழில் அறிமுகமானார். இந்நிலையில், சமீபத்தில் கொச்சியிலுள்ள தைக்கட்டு மகாதேவ கோயிலில் நடந்த திருவிழாவில் சிறப்பு விருந்தினராக கலந்துகொண்டார். அவர் கிறிஸ்தவ மதத்தை சேர்ந்தவர் என்பதால், இந்து கோயில் திருவிழாவில் சிறப்பு அழைப்பாளராக கலந்துகொண்டது குறித்து சோஷியல் மீடியாவில் பலர் கடுமையாக விமர்சித்துள்ளனர். அந்த விழாவில் அன்னா பென் பேசுகையில், இதுகுறித்து விளக்கம் அளித்தார்.

இதை பலர் கவனிக்க தவறிவிட்டனர். மலையாள படவுலகின் பிரபல கதாசிரியர் பென்னி நாயரம்பலம் என்பவரின் மகள், அன்னா பென். அவர் பேசும்போது, ‘என் தந்தையின் பெயர் பென்னி நாயரம்பலம் என்று யாரிடம் நான் சொன்னாலும், நாயரம்பலம் என்பது இந்துக்களில் ஒரு குறிப்பிட்ட சமூகத்தினர் குறிப்பிடும் பெயராயிற்றே என்று ஆச்சரியத்துடன் கேட்பார்கள். எனக்கு ‘அன்னா’ என்று பெயர் சூட்டினர். பள்ளிக்கூடத்தில், அன்னா என்றால் அன்னபூரணியா என்று கேட்கும் அளவுக்கு எனது பெயர் ஆர்வத்தை தூண்டியது. நான் திரைத்துறைக்கு வந்த பிறகு எனது தந்தையின் பெயரையும் சேர்த்து, ‘அன்னா பென்’ என்று மாற்றிக்கொண்டேன். கேரள கலாச்சாரம், எல்லா மதங்களையும் ஒன்றிணைத்து தழுவி செல்லும்படி எங்களுக்கு கற்பித்துள்ளது’ என்றார்.