விஷ்வக் சென் இயக்கி முதன்மை கதாபாத்திரத்தில் நடித்துள்ள படம், ‘கல்ட்’. இதற்கு ‘கேஜிஎஃப்’ ரவி பஸ்ரூர் இசை அமைத்துள்ளார். இப்படம் தெலுங்கு, இந்தி உள்பட வெளிநாட்டு மொழிகளிலும் விரைவில் திரைக்கு வருகிறது. இப்படத்தின் டீசர் வெளியீட்டு விழா ஐதராபாத்தில் நடந்தது. அப்போது ரவி பஸ்ரூருக்கு ரோலக்ஸ் வாட்ச் ஒன்றை விஷ்வக் சென் பரிசளித்தார். இதுகுறித்து பேசிய ரவி பஸ்ரூர், ‘எனக்கு இசையில் 25 வருட அனுபவம் இருக்கிறது. நல்லவர்களுக்கு நல்ல இசையை வழங்க வேண்டும் என்று எப்போதுமே நான் தீவிரமாக முயற்சிப்பேன். இன்று இப்பரிசின் மூலம் விஷ்வக் சென் எனது ஆன்மாவை கவுரவித்துள்ளார்.

இசை மீதான எனது அர்ப்பணிப்பை அவர் மனம் திறந்து பாராட்டினார். இது வெறும் வாட்ச் அல்ல, இது இசைக்கலைஞர்களுக்கான பாராட்டு’ என்றார். மேலும், தனது சிறுவயதில் இரண்டு முறை தற்கொலைக்கு முயன்றதாக அவர் தெரிவித்தார். இதுகுறித்து அவர் பேசுகையில், ‘எனது 18வது வயதில் நான் இரண்டு முறை தற்கொலைக்கு முயன்றேன். ஆனால், இரண்டு முறையும் காப்பாற்றப்பட்டேன். இரண்டாவது முறையாக என்னை காப்பாற்றியவர், எனது இசையை கேட்டு மயங்கி, எனக்கு ஒரு கீபோர்டு வாங்கிக் கொடுத்து, கூடுதலாக 35 ஆயிரம் ரூபாயும் கொடுத்தார். அன்று நான் எனது பெயரை ரவி என்று மாற்றினேன். அது என் உயிரை காப்பாற்றியவரின் பெயர் என்பது குறிப்பிடத்தக்கது’ என்றார்.