சென்னை: ஓசை பிலிம்ஸ் தயாரிப்பில் வாழ்வியல் கலந்த அழகான காதல் கதையாக உருவாகியுள்ள திரைப்படம் ‘அந்தோனி’ . இப்படத்தின் முதல் பார்வை போஸ்டரை, நடிகர் துல்கர் சல்மான், இயக்குநர் சீனு ராமசாமி, ‘சிறை’ திரைப்படக் கதையாசிரியர் தமிழ் ஆகயோர் வெளியிட்டார்கள். ‘அந்தோனி’ படத்தின் முதல் பார்வை மற்றும் சில ட்ரெய்லர் காட்சிகள், நடிகர் துல்கர் சல்மானுக்குக் காண்பிக்கப்பட்டது.

காட்சிகளைப் பார்த்த துல்கர் சல்மான் படக்குழுவை வெகுவாகப் பாராட்டினார். மேலும், இப்படம் சிறப்பான வெற்றியைப் பெற வாழ்த்துகளையும் தெரிவித்தார். ‘அந்தோனி’ படத்தை ஜெனோசன் மற்றும் சுகிர்தன் ஆகிய இரு அறிமுக இயக்குநர்கள் எழுதி இயக்கியுள்ளார்கள். இப்படத்திற்கு இளையராஜா இசையமைத்துள்ளார். கயல் வின்சன்ட் கதாநாயகனாக நடித்திருக்கிறார். அவருடன், டி.ஜே.பானு, சுதர்ஷன், செளமி, அருள்தாஸ், நிழல்கள் ரவி, ஆண்டவன் கட்டளை அரவிந்தன் உள்ளிட்ட பலர் முக்கிய வேடங்களில் நடித்துள்ளனர்.

நெய்தல் நிலப் பின்னணியில் கடல் வாழ்வியல், காதல், குடும்ப வாழ்வுடன், ஆழமான உணர்வுகளையும் இணைத்து, இக்கதை உருவாக்கப்பட்டுள்ளது. இலங்கையில் யாழ்ப்பாணம் மற்றும் பல்வேறு இடங்களில் படமாக்கப்பட்ட இந்தத் திரைப்படம், தற்போது உலகம் முழுவதும் திரையரங்குகளில் வெளியீட்டுக்குத் தயாராகி வருகிறது. ஒளிப்பதிவு, ரிஷி செல்வம். படத்தொகுப்பு, சுரேஷ் ஏ. பிரசாத். கலை இயக்கம், கலா மோகன்.