மும்பை: சல்மான் கான் அணிந்திருக்கும் கைக்கடிகாரம் அனைவரையும் கவரும் விதத்தில் இருக்கிறது. ரூ.34 லட்சம் மதிப்பிலான எபிக் எக்ஸ் ராம் ஜென்மபூமி டைட்டானியம் 2 ரக கடிகாரத்தை அவர் கையில் அணிந்திருக்கிறார். மிகவும் சொற்ப எண்ணிக்கையில் மட்டுமே தயாரிக்கப்பட்டுள்ள இக்கடிகாரம் ராம ஜென்மபூமியின் கலாசாரம் மற்றும் ஆன்மிகத்தை பிரதிபலிக்கும் வகையில் தனித்துவமான வேலைப்பாடுகளால் வடிவமைக்கப்பட்டுள்ளது. இக் கடிகாரம், ராம ஜென்மபூமி மற்றும் இந்திய வரலாறு மற்றும் அதன் முக்கியத்துவத்துடன் தொடர்புடைய கூறுகளைக் காட்டும் வேலைப்பாடுகளைக் கொண்டுள்ளது. சல்மான் அணிந்துள்ள இந்த வாட்ச் தற்போது வைரலாகி வருகிறது. இது பற்றி பலரும் இணையத்தில் தகவல் தேட ஆரம்பித்துள்ளனர்.

கடிகாரத்தில் ராம ஜென்மபூமி கோயில் சிற்பத்துடன் மிக நுணுக்கமாக செதுக்கப்பட்டுள்ளது. கூடுதலாக இந்து கடவுள்கள் பொறிக்கப்பட்டுள்ளது. 2டி டைட்டானியத்தில் வடிவமைக்கப்பட்டுள்ளது என்று அதனை வடிவமைத்த எதோஸ் நிறுவனம் தெரிவித்துள்ளது. சல்மான் கான் அணிந்திருக்கும் கடிகாரம் 44 மிமீ அளவு கொண்டதாகும். இக்கடிகாரத்தை கடந்த ஆண்டுதான் எதோஸ் நிறுவனம் அறிமுகம் செய்தது. ராம ஜென்மபூமி டிசைனில் இரண்டு கடிகாரம் வெளியிடப்பட்டுள்ளது. ஏற்கனவே இந்திய கலாசாரத்தை பிரதிபலிக்கும் விதமாக இந்தியா கேட், கேட்வே ஆஃப் இந்தியா, தாஜ்மகால் மற்றும் குதுப்மினார் ஆகியவற்றை பிரிதிபலிக்கும் வகையில் கடிகாரங்களை எதோஸ் நிறுவனம் வெளியிட்டு கெளரவித்துள்ளது.