ஊத்துக்கோட்டை, ஏப்.2: ஊத்துக்கோட்டை அருகே சீத்தஞ்சேரி கிராமத்தில் வசிப்பவர் பாலாஜி (55), சீத்தஞ்சேரி பஜார் பகுதியில் பேன்சி ஸ்டோர் நடத்தி வருகிறார். இவர், நேற்று முன்தினம் இரவு 9 மணிக்கு வழக்கம்போல் கடையை பூட்டிவிட்டு வீட்டிற்குச் சென்றுவிட்டார். நேற்று காலை பஜார் பகுதிக்குச் சென்ற சிலர், பாலாஜியின் பேன்சி ஸ்டோரில் இருந்து கரும்புகை வருவதை கண்டு, பாலாஜிக்கு தகவல் தெரிவித்தனர். உடனடியாக, கடைக்குச் சென்ற பாலாஜி, கடையை திறந்து பார்த்தபோது கடைக்குள் இருந்த பொருட்கள் எரிந்து கொண்டிருந்தது.

இதனால் அதிர்ச்சியடைந்த பாலாஜி, இதுகுறித்து தீயணைப்பு நிலையத்திற்கு தகவல் தெரிவித்துள்ளார். அதன்பேரில், சம்பவ இடத்திற்கு வந்த பென்னாலூர்பேட்டை போலீசார் மற்றும் திருவள்ளூர் தீயணைப்பு வீரர்கள், பேன்சி ஸ்டோரில் தண்ணீரை பீய்ச்சியடித்து தீயை முழுவதுமாக அணைத்தனர். இதில் கடையில் இருந்த பொருட்கள் எரிந்து நாசமாகின. இதுகுறித்து, பென்னாலூர்பேட்டை இன்ஸ்பெக்டர் தேவராஜ், எஸ்ஐ நாகராஜ் ஆகியோர் வழக்குப்பதிவு செய்து, விசாரணை நடத்தி வருகின்றனர்.

The post பேன்சி ஸ்டோரில் தீ விபத்து appeared first on Dinakaran.