திருக்கழுக்குன்றம்: புதுப்பட்டினத்தில் அரசு பள்ளியில் நுழைந்த மர்ம நபர்கள் பீரோவை உடைத்த பார்த்தபோது பணம் இ்லலாத விரக்தியில் பள்ளியில் சிசிடிவி, கணினி உள்ளிட்டவற்றை அடித்து நெறுக்கி சூறையாடி சென்றுள்ளனர். இது குறிதது போலீசார் வழக்கு பதிவு செய்து விசாரணை நடத்தி வருகின்றனர். இச்சம்பவம் அப்பகுதியில் பெரும் பரபரப்பு ஏற்படுத்தியுள்ளது. கல்பாக்கம் நகரிய பகுதியான புதுப்பட்டினத்தில் அரசினர் மேல்நிலைப்பள்ளி செயல்பட்டு வருகிறது.

இப்பள்ளியில், கல்பாக்கம், புதுப்பட்டினம் மற்றும் அதன் சுற்றுவட்டார பகுதிகளை சேர்ந்த 1500க்கும் மேற்பட்ட மாணவ – மாணவிகள் கல்வி பயின்று வருகின்றனர். தற்போது, அரையாண்டு தேர்வு முடிந்து விடுமுறை விடுவிக்கப்பட்டுள்ள நிலையில், இப்பள்ளியில் தலைமை ஆசிரியர் மற்றும் அலுவலக அறைக்குள் நுழைந்த மர்ம நபர்கள், அங்கிருந்த 3 சிசிடிவி கேமராக்களை உடைத்துவிட்டு, தலைமை ஆசிரியர் அறையில் பீரோவையும் உடைத்து பார்த்துள்ளனர்.

பீரோவில், பணம் ஏதும் கிடைக்காததால், விரக்தியடைந்த மர்ம நபர்கள், அங்கிருந்த மாணவர்களின் வருகை பதிவேடு, மாற்றுச்சான்றிதழ் பதிவேடு புத்தகம் மற்றும் மாணவர்களின் விவரங்கள் அடங்கிய ஆவணங்களை கிழித்தும், கணினியை உடைத்தும், வேதியியல் பிரிவு ஆய்வகத்தினை சேதப்படுத்தியும், மாணவர்கள் பயன்படுத்தும் பொருட்களையும் அடித்து உடைத்து சேதப்படுத்தியுள்ளனர்.

அதிர்ச்சியடைந்த பள்ளி தலைமை ஆசிரியர் இதுகுறித்து கல்பாக்கம் காவல் நிலையத்தில் புகார் அளித்துள்ளார். அதன்பேரில், வழக்குப்பதிவு செய்த போலீசார், பள்ளியின் உபகரணங்களை சேதப்படுத்திய மர்ம நபர்களை போலீசார் தேடி வருகின்றனர். இதேப்போன்று, பலமுறை சம்பவங்கள் நடந்த நிலையில் பலமுறை புகார் கொடுத்தும், இதுவரை போலீசார் எவ்வித நடவடிக்கையும் எடுக்காமல் மெத்தனப்போக்கில் உள்ளதாக பொதுமக்களும், சமூக ஆர்வலர்களும் குற்றம் சாட்டுகின்றனர்.

The post பீரோவில் பணம் இல்லாததால் விரக்தி அரசு பள்ளியை சூறையாடிய மர்ம நபர்கள்: புதுப்பட்டினத்தில் பரபரப்பு appeared first on Dinakaran.