கிருஷ்ணகிரி, டிச.16: கிருஷ்ணகிரி மாவட்டத்தில் நிலவும் கடும் பனிப்பொழிவால், பொதுமக்கள் அவதிக்குள்ளாகி உள்ளனர்.கிருஷ்ணகிரி மாவட்டம் முழுவதும் கடந்த ஒரு மாதத்திற்கும் மேலாக கடும் பனி காணப்படுகிறது. இதனால் மக்கள் மிகவும் சிரமத்திற்கு உள்ளாகிறார்கள். நேற்றும் கடுமையான பனி காணப்பட்டது. இதனால் காலை நேரத்தில் வாகன ஓட்டிகள் செல்ல முடியாமல் சிரமத்திற்கு உள்ளாகினர். குறிப்பாக கிருஷ்ணகிரியில் தேசிய நெடுஞ்சாலையில், பனிமூட்டத்தால் எதிரில் வரும் வாகனங்கள் கூட தெரியாத நிலை இருந்தது. இதனால் வாகனங்கள் முகப்பு விளக்குகளை எரியவிட்டபடி சென்றன. காலை 9 மணி வரையில் இந்த பனி காணப்பட்டது. கடும் பனிமூட்டம் காரணமாக, சாலைகளில் சென்ற பொதுமக்கள் ஸ்வெட்டர், குல்லா, ஜர்கின் அணிந்தபடி செல்வதை காண முடிந்தது. மேலும், கிருஷ்ணகிரியில் பெங்களூரு சாலையில் ெஜர்கின், மப்ளர், குல்லா, குளிர் காலத்திற்கு ஏற்ப பெட்ஷீட்டுகள், கம்பளிகள் விற்பனை ஜோராக இருந்தது. ஏராளமான பொதுமக்கள் அவற்றை வாங்கி சென்றனர். பனிப்பொழிவின் காரணமாக முதியவர்கள், குழந்தைகள் சளி தொந்தரவால் அவதிக்குள்ளாகி உள்ளனர்.

The post மாவட்டம் முழுவதும் பனிப்பொழிவு ; மக்கள் அவதி appeared first on Dinakaran.