சென்னை: சென்னை, கே.கே.நகர், முத்து மாரியம்மன் திருக்கோயிலில் ரூ.32.75 லட்சம் மதிப்பீட்டில் கட்டப்படவுள்ள புதிய இராஜகோபுர திருப்பணிக்கு அறநிலையத்துறை அமைச்சர் சேகர்பாபு அடிக்கல் நாட்டினார். முதலமைச்சர் மு.க.ஸ்டாலின் வழிகாட்டுதலின்படி, இந்து சமய அறநிலையத்துறை அமைச்சர் சேகர்பாபு இன்று (14.11.2024) சென்னை, கே.கே.நகர், முத்து மாரியம்மன் திருக்கோயிலில் ரூ.32.75 லட்சம் மதிப்பீட்டில் கட்டப்படவுள்ள புதிய இராஜகோபுர திருப்பணிக்கு அடிக்கல் நாட்டினார். இந்து சமய அறநிலையத்துறையானது தன் ஆளுகைக்குட்பட்ட திருக்கோயில்களில் திருப்பணிகள் மேற்கொண்டு குடமுழுக்கு நடத்துதல், திருத்தேர் மற்றும் திருக்குளங்களை சீரமைத்தல், பக்தர்களுக்கான அடிப்படை வசதிகளை மேம்படுத்தி வழங்குதல், திருக்கோயில் சொத்துக்களை ஆக்கிரமிப்பாளர்களிடமிருந்து மீட்டெடுத்து பாதுகாத்தல் போன்ற பணிகளை செம்மையாக மேற்கொண்டு வருகிறது.

சென்னை, கே.கே.நகரில் அமைந்துள்ள அருள்மிகு முத்து மாரியம்மன் திருக்கோயில் 50 ஆண்டுகள் பழமையான திருக்கோயிலாகும். இத்திருக்கோயிலுக்கு கடந்த 09.07.2009 அன்று குடமுழுக்கு நடைபெற்றது. தற்போது ரூ. 32.75 இலட்சம் மதிப்பீட்டில் புதிய இராஜகோபுரம் கட்டும் பணி, ரூ. 25 லட்சம் மதிப்பீட்டில் மூலவர் சன்னதி மற்றும் விமானம் அமைக்கும் பணி மற்றும் ரூ.25.50 லட்சம் மதிப்பீட்டில் மகா மண்டபம் கட்டும் பணி என மொத்தம் ரூ.83.25 லட்சம் மதிப்பீட்டிலான திருப்பணிகள் மேற்கொள்ளப்பட உள்ளன. இந்து சமய அறநிலையத்துறை அமைச்சர் சேகர்பாபு இன்று புதிய இராஜகோபுரம் கட்டும் பணிக்கு அடிக்கல் நாட்டினார். இந்நிகழ்வின்போது பெருநகர சென்னை மாநகராட்சி மேயர் பிரியா ராஜன், விருகம்பாக்கம் சட்டமன்ற உறுப்பினர் ஏ.எம்.வி.பிரபாகர் ராஜா, வேல்ஸ் பல்கலைக்கழக வேந்தர் ஐசரி கணேசன், திருக்கோயில் அறங்காவலரும் லண்டன் கிரைடன் துணை மேயருமான தாமோதரன் சீனிவாசன், அறங்காவலர் ஜெயசேகரன் சீனிவாசன், சென்னை மண்டல இணை ஆணையர் கி.ரேணுகாதேவி, மாமன்ற உறுப்பினர் க.தனசேகரன் மற்றும் அலுவலர்கள் கலந்துக் கொண்டனர்.

 

The post சென்னை, கே.கே.நகர், முத்து மாரியம்மன் திருக்கோயிலில் ரூ.32.75 லட்சம் மதிப்பீட்டில் கட்டப்படவுள்ள புதிய இராஜகோபுர திருப்பணிக்கு அடிக்கல் நாட்டினார் அமைச்சர் சேகர்பாபு..!! appeared first on Dinakaran.