புதுடெல்லி: ‘ஜனநாயகம் முடிவுக்கு வந்து விட்டது. நாடாளுமன்றத்தில் எதிர்க்கட்சிகள் பேச அனுமதிக்கப்படுவதில்லை’’ என காங்கிரஸ் எம்பி பிரியங்கா காந்தி நேற்று குற்றம்சாட்டினார். பிரதமர் மோடியின் வீட்டை முற்றுகையிட்டு எம்பிக்கள் நேற்று முன்தினம் நடத்திய தர்ணா போராட்டம் குறித்து, காங்கிரஸ் எம்பி பிரியங்கா காந்தி நேற்று நாடாளுமன்ற வளாகத்தில் செய்தியாளர்களுக்கு அளித்த பேட்டியில் கூறியதாவது:
ஜனநாயகத்தில் மிக முக்கியமான விஷயம் கருத்து சுதந்திரம் மற்றும் அமைதியான முறையில் போராடுவதற்கான உரிமைதான். அதில் ஜனநாயக விரோதமானது என எதுவும் இல்லை. நாடாளுமன்றத்திலும் தெருக்களிலும் நடப்பவை தான் ஜனநாயக விரோதமானவை. நாடாளுமன்றத்தில் விவாதம் நடத்த அனுமதிக்கப்படுவதில்லை. நாடாளுமன்ற எதிர்க்கட்சி தலைவரையோ, பிற எதிர்க்கட்சி தலைவர்களையோ பேச அனுமதிப்பதில்லை.
அவர்கள் பேச எழும்போது எல்லாம் தடுக்கப்படுகிறார்கள். விவாதம் நடத்தலாமா என்று அரசிடம் கேட்க வேண்டும் என்று சபாநாயகர் கூறுகிறார். இதற்கு என்ன அர்த்தம்? ஜனநாயகம் முடிந்து விட்டது. பிரதமர் இல்லத்திற்கு வெளியே நடந்த தர்ணா போராட்டத்தில் எங்களுக்கு என்ன நடந்தது என்பது முக்கியமில்லை. நாங்கள் மாணவர்களுடன் நிற்கிறோம். அவர்களுக்காக குரல் கொடுக்கிறோம். மாணவர்களுக்கு என்ன நடந்தது, அது சரியா, தவறா? என்பதை பார்க்க வேண்டும். அவர்கள் அனைவரும் இளம் மாணவர்கள். அவர்கள் போராடுகிறார்கள்.
இது ஏதோ சாதாரண போராட்டம் அல்ல. உண்மையான பிரச்னை, நியாயமான சிக்கல். இந்நாட்டின் ஒவ்வொரு பெற்றோருக்கும் இது தெரியும். ஒவ்வொரு மாணவருக்கும் தெரியும். ஒவ்வொரு ஆசிரியருக்கும் தெரியும். இது ஒரு உண்மையான பிரச்னை. மாணவர்கள் தங்கள் உரிமைகளை கேட்கிறார்கள். மாணவர்கள் மிகுந்த அர்ப்பணிப்புடன் படித்து, தங்களுக்கான எதிர்காலத்தை உருவாக்கப் போராடுகிறார்கள். ஆனால் அவர்களின் எதிர்காலம் அழிக்கப்படுகிறது.
ஒட்டுமொத்த கல்வி பட்ஜெட் ரூ. 1.4 லட்சம் கோடி. ஆனால் அதானி, அம்பானிக்கு ரூ. 16 லட்சம் கோடி மதிப்பிலான கடன்களை தள்ளுபடி செய்கிறார்கள். விவசாயிகளுக்கு எதுவும் கிடைப்பதில்லை. ஏழைகளுக்கு எதுவும் கிடைப்பதில்லை. மாணவர்களுக்கும் எதுவும் கிடைப்பதில்லை. இவ்வாறு அவர் கூறினார்.
