- எங்களுக்கு
- ஈரான்
- பாகிஸ்தான்-கத்தார்
- சூரிச்
- பர்கன்ஸ்டாக் ஹோட்டல்
- சுவிச்சர்லாந்து
- லூசெர்ன் ஏரி உச்சிமாடம்
- துணை ஜனாதிபதி
- ஜே.டி. வேன்ஸ்…
ஜூரிச்: அமெரிக்கா-ஈரான் இடையே போர் நிறுத்தத்திற்கான இடைக்கால புரிந்துணர்வு ஒப்பந்தம் ஏற்பட்டதைத் தொடர்ந்து, தொழில்நுட்ப ரீதியான பேச்சுவார்த்தையை தொடங்குவதற்கான கூட்டம் சுவிட்சர்லாந்தின் பர்கன்ஸ்டாக் விடுதியில் நேற்று முன்தினம் தொடங்கியது. லேக் லுசெர்ன் உச்சிமாநாடு எனப்படும் இக்கூட்டத்தில் துணை அதிபர் ஜே.டி.வான்ஸ் தலைமையில் அமெரிக்க பிரதிநிதிகளும், நாடாளுமன்ற சபாநாயகர் கலிபாப் தலைமையில் ஈரான் பிரதிநிதிகளும் பங்கேற்றனர். இவர்களுடன் மத்தியஸ்தம் செய்யும் நாடுகளுடனான பாகிஸ்தானின் பிரதமர் ஷெபாஸ் ஷெரீப், கத்தார் பிரதமர் ஷேக் முகமது பின் அப்துல்ரஹ்மான் அல் தானி ஆகியோரும் கலந்து கொண்டனர்.
2வது நாளாக நேற்றும் நடந்த இக்கூட்டம் சுமார் 18 மணி நேரத்திற்கு பிறகு நிறைவடைந்ததாக அறிவிக்கப்பட்டது. போர் நிறுத்தத்திற்குப் பிறகு முதல் முறையாக அமெரிக்கா-ஈரான் இடையேயான இப்பேச்சுவார்த்தை வெற்றிகரமாக முடிந்ததாக பாகிஸ்தான் மகிழ்ச்சி தெரிவித்துள்ளது. அதன் கூட்டறிக்கையில், ‘‘தொழில்நுட்ப பேச்சுவார்த்தைக்கான வழிமுறையை உருவாக்குவது உட்பட ஊக்கமளிக்கும் முன்னேற்றங்கள் ஏற்பட்டுள்ளன. அடுத்த 60 நாட்களுக்குள் இறுதி ஒப்பந்தத்தை எட்டுவதற்கான செயல் திட்டத்திற்கு அமெரிக்கா-ஈரான் தரப்பு ஒப்புக்கொண்டுள்ளது.
மேலும், தவறான புரிதல்களைத் தடுப்பதற்கும், ஹார்முஸ் ஜலசந்தி வழியாக வர்த்தக கப்பல்கள் பாதுகாப்பாக செல்வதை எளிதாக்குவதற்கும், புரிந்துணர்வு ஒப்பந்தத்தில் குறிப்பிடப்பட்டுள்ள காலத்திற்கு இரு தரப்பினருக்கும் இடையே ஒரு பிரத்யேகத் தகவல் தொடர்பு வழித்தடம் நிறுவப்பட்டுள்ளது. இனி புரிந்துணர்வு ஒப்பந்தத்தின் அம்சங்களை அமல்படுத்த உயர்மட்ட குழு அமைக்கப்பட்டு, அக்குழு தலைமைப் பேச்சுவார்த்தையாளர்களிடமிருந்து வழக்கமான கருத்துக்களை பெற்று அடுத்த கட்ட நடவடிக்கைகள் எடுக்கப்படும்’’ என கூறப்பட்டுள்ளது.
அடித்தளம் போட்டாச்சு
பேச்சுவார்த்தைக்கு பின் அமெரிக்க துணை அதிபர் ஜே.டி.வான்ஸ் செய்தியாளர்களுக்கு அளித்த பேட்டியில், ‘‘இறுதி ஒப்பந்தம் தான் வீடு. அதற்கான நல்ல அடித்தளத்தை நாங்கள் அமைத்திருக்கிறோம். அமெரிக்க மக்களுக்காக நல்ல ஒரு இடத்தில் வெற்றிகரமான இறுதி ஒப்பந்தத்திற்கான அடித்தளம் அமைக்கப்பட்டு விட்டது’’ என்றார். அமெரிக்காவின் சோயா, சோளம், கோதுமையை வாங்க ஈரானின் முடக்கப்பட்ட சொத்துக்களை விடுவிக்க அமெரிக்க நிர்வாகம் ஒப்புக்கொள்ளக்கூடும் என்றும் ஜே.டி.வான்ஸ் குறிப்பிட்டார்.
