டெல்லி: நீட் மறு தேர்வு ஹால் டிக்கெட்டை பதிவிறக்கம் செய்வதில் தொழில்நுட்பக் கோளாறால் தேர்வர்கள் தவித்து வருகின்றனர். தொழில்நுட்ப கோளாறை சரி செய்ய முயன்று வருவதாக தேசிய தேர்வு முகமை விளக்கம் அளித்துள்ளது.
கடந்த மாதம் இந்தியா முழுவது நடந்த நீட் தேர்வு என்பது வினாத்தாள் கசிவு விவகாரம் மூலமாக ரத்து செய்யப்பட்டது. எனவே மறு தேர்வு ஜூன் 21ஆம் தேதி நடைபெறும் என்று அறிவிக்கப்பட்டது. அதற்கான ஹால் டிக்கெட் நேற்று வெளியிடப்பட்டது. மாணவ மாணவியர் அவர்களது விண்ணப்ப எண் மற்றும் பிறந்த தேதி உள்ளிட்டவற்றை உள்ளீடு செய்து ஹால் டிக்கெட் பதிவிறக்கம் செய்துகொள்ளலாம் என்று அறிவித்த நிலையில் அந்த பதிவிறக்கம் செய்வதில் பல்வேறு சிக்கல்கள் ஏற்பட்டதாக மாணவர்கள் புகார் அளித்தனர்.
இந்நிலையில் சர்வர் கோளாறு மற்றும் தொழில்நுட்ப கோளாறு உள்ளிட்டவற்றை தீர்க்க தொடர்ந்து பணியாற்றி வருவதாகவும் விரைவில் இந்த சிக்கல்கள் தீர்ந்து ஹால் டிக்கெட் வெளியிடப்படும் என்று தேசிய தேர்வு முகமை விளக்கம் அளித்துள்ளது. இந்த சர்வர் பிரச்சினைகளை சரி செய்ய தீவிரமாகப் பணியாற்றி வருவதாகவும், மாணவர்கள் பீதியடைய வேண்டாம் என்றும் தேசிய தேர்வு முகமை கேட்டுக்கொண்டுள்ளது. இதுவரை சுமார் 4 லட்சம் பேர் வெற்றிகரமாக ஹால் டிக்கெட்டைப் பதிவிறக்கம் செய்துள்ளதாகத் தேசிய தேர்வு முகமை அதிகாரப்பூர்வ தகவல் அளித்துள்ளது.
