- திரிணாமூல் காங்கிரஸ்
- மம்தா
- கொல்கத்தா
- மேற்கு வங்காள சட்டமன்றத் தேர்தலில்
- முதல் அமைச்சர்
- மேற்கு வங்கம்...
கொல்கத்தா: மேற்கு வங்க சட்டமன்ற தேர்தலில் திரிணாமுல் காங்கிரஸ் தோல்வியடைந்த நிலையில் அக்கட்சியின் 58 எம்எல்ஏக்கள் பிரிந்து ஒரு அணியாக செயல்படத் தொடங்கி உள்ளது முன்னாள் முதல்வர் மம்தாவிற்கு கடும் நெருக்கடியை ஏற்படுத்தி உள்ளது. மேற்கு வங்க மாநிலத்தில் நடந்து முடிந்த சட்டமன்ற தேர்தலில் ஆளும் திரிணாமுல் காங்கிரஸ் கட்சி அதிர்ச்சி தோல்வி அடைந்தது. 15 ஆண்டுகளாக முதல்வராக இருந்த திரிணாமுல் காங்கிரஸ் தலைவர் மம்தா பானர்ஜி அவர் போட்டியிட்ட பவானிபூர் தொகுதியில் தோல்வியை சந்தித்தார். மாநிலத்தில் பாஜ தலைமையிலான அரசு அமைந்து முதல்வராக திரிணாமுல் காங்கிரஸ் கட்சியில் இருந்து வெளியேறிய சுவேந்து அதிகாரி முதல்வராகி உள்ளார்.
இந்த சூழ்நிலையில் வலுவான கட்சியாக இருந்த திரிணாமுல் காங்கிரஸ் கட்சியில் விரிசல் விழத் தொடங்கி உள்ளது. மொத்தமுள்ள 80 எம்எல்ஏக்களில் 58 பேர் ஒரு அணியாக செயல்படத்தொடங்கியுள்ளது கட்சியின் தலைவர் மம்தா பானர்ஜிக்கு கடும் நெருக்கடியை ஏற்படுத்தி உள்ளது. அதிருப்தி எம்எல்ஏக்கள் மம்தாவின் தலைமையை தொடர்ந்து அங்கீகரிக்கும் அதே வேளையில் அவரது மருமகனும் அரசியல் வாரிசுமான அபிஷேக்கின் அதிகாரத்தை நிராகரிக்கின்றனர்.
இந்த அதிருப்தி நாடாளுமன்றத்திற்குள் பரவுவதை தடுப்பது எப்படி என்பதே திரிணாமுல் கட்சியின் மிகப்பெரிய கவலையாக உள்ளது. இந்த விவகாரம் நாடாளுமன்ற உறுப்பினர்களிடையே ஏற்படுத்தும் எந்தவொரு மாற்றமும் திரிணாமுல் காங்கிரஸ் கட்சியின் அடித்தளத்தையே அசைக்கக்கூடும். திரிணாமுல் காங்கிரஸ் கட்சிக்கு 28 மக்களவை உறுப்பினர்கள் மற்றும் 13 மாநிலங்களவை உறுப்பினர்கள் உள்ளனர். நாடாளுமன்றத்தில் திரிணாமுல் காங்கிரஸ் மிகப்பெரிய எதிர்க்கட்சிகளில் ஒன்றாக திகழ்கிறது. இதில் ஏற்படும் எந்தவொரு மாற்றமும் மம்தா பானர்ஜியின் தேசிய அளவிலான செல்வாக்கை மட்டுமல்ல, எதிர்க்கட்சி கூட்டணியின் ஒட்டுமொத்த பலத்தையும் பலவீனப்படுத்தக்கூடும்.
எனவே திரிணாமுல் காங்கிரசை பொறுத்தவரை அமைப்பை கட்டியெழுப்புவதை போலவே கிளர்ச்சியை அடக்குவதும் முக்கியமாகிவிட்டது. மேலும் அதிருப்தி எம்எல்ஏக்கள் அணியானது ஏற்கனவே திரிணாமுல் காங்கிரசை பிரதிநிதித்துவப்படுத்துவதற்காக உரிமை கோரியுள்ளனர். எதிர்த் தரப்பு தேர்தல் ஆணையத்தை அணுகினால் இந்த போராட்டம் சட்டமன்றத்தில் இருந்து சட்டரீதியான போராட்டமாக மாறக்கூடும். தேர்தல் ஆணையம் கட்சியின் சின்னத்தை ஒரு பிரிவுக்கு வழங்கக்கூடும் அல்லது சின்னத்தை முடக்கக்கூடும், இரு அணியையும் புதிய சின்னங்களின் கீழ் போட்டியிடுமாறு உத்தரவிடலாம் என்று கூறப்படுகிறது.
6 எம்பிக்கள் மட்டுமே வந்ததால் பரபரப்பு;
தற்போது திரிணாமுல் காங்கிரஸ் கட்சிக்கு மக்களவையில் 28 உறுப்பினர்களும், மாநிலங்களவையில் 13 உறுப்பினர்களும் உள்ளனர். மம்தா நேற்று தனது வீட்டில் நடத்திய கூட்டத்தில் 8 எம்எல்ஏக்களும், 6 எம்பிக்களும் மட்டுமே கலந்து கொண்டனர். இதனால் எம்பிக்களும் பிரிந்து செல்ல வாய்ப்பு உருவாகி உள்ளது. கட்சித் தாவல் தடைச் சட்ட விதிகளின்படி, நாடாளுமன்றக் கட்சியின் மொத்த உறுப்பினர்களில் மூன்றில் இரண்டு பங்கு கொண்ட ஒரு குழு, சட்டத்தால் அங்கீகரிக்கப்பட்ட சூழ்நிலைகளின் கீழ் பிரிந்து சென்றால், தகுதி நீக்க நடவடிக்கையிலிருந்து தப்பிக்க வாய்ப்புள்ளது.
