வாஷிங்டன்: ஈரானிடம் அணு ஆயுதங்கள் இருக்கக் கூடாது என்பதில் அமெரிக்காவும் சீனாவும் ஒருமித்த கருத்தைக் கொண்டுள்ளதாக அதிபர் டிரம்ப் தெரிவித்துள்ளார். அமெரிக்க அதிபர் டிரம்ப், சீனாவிற்கு 3 நாட்கள் அரசுமுறைப் பயணம் மேற்கொண்டார். அப்போது சீன அதிபர் ஜி ஜின்பிங்கை சந்தித்து மேற்கு ஆசிய மோதல் மற்றும் பிராந்திய பிரச்னைகள் குறித்து விவாதித்தார். சீனாவில் இருந்து புறப்பட்ட பிறகு ஏர் போர்ஸ் ஒன் விமானத்தில் செய்தியாளர்களிடம் பேசிய அதிபர் டிரம்ப், ‘ஹார்முஸ் ஜலசந்தியை அமெரிக்கா தனது கட்டுப்பாட்டில் வைத்துள்ளது.
கடந்த இரண்டரை வாரங்களாக அமெரிக்காவின் கடற்படை முற்றுகை காரணமாக ஈரானுக்கு ஒரு நாளைக்கு 500 மில்லியன் டாலர் இழப்பு ஏற்பட்டுள்ளது. சீன அதிபர் மீது எனக்கு மிகுந்த மரியாதை உள்ளது. ஈரான் அணு ஆயுதம் வைத்திருக்கக் கூடாது என்பதில் அவர் உறுதியாக இருக்கிறார். அவர் ஜலசந்தியை திறக்க வேண்டும் என்று விரும்புகிறார். ஈரான் அதை மூடினால் நாம் அவர்களை மூடிவிடுவோம் என்று அவர் கூறியது உண்மைதான். கடந்த இரண்டரை வாரமாக அவர்கள் எந்த வணிகமும் செய்யவில்லை’ என்று தெரிவித்தார்.
மேலும் தைவான் விவகாரம் குறித்தும் ஜி ஜின்பிங்குடன் விரிவாக ஆலோசித்ததாக டிரம்ப் கூறினார். தைவான் சுதந்திரத்திற்காகப் போராடுவதை ஜின்பிங் விரும்பவில்லை என்றும், அது கடுமையான மோதலுக்கு வழிவகுக்கும் என்றும் அவர் குறிப்பிட்டார். நமக்கு 9,500 மைல் தொலைவில் தைவான் போர் நடக்கிறது. சீன அதிபர் ஜின்பிங் தைவான் விவகாரத்தில் மிகவும் தீவிரமாக இருக்கிறார்’ என்றார்.
