பெங்களூரு: கர்நாடகாவில் மே 4ம் தேதிக்கு பிறகு முதல்வர் மாற்றப்படலாம் என்று பேசப்பட்டு வரும் நிலையில், இப்போதைக்கு முதல்வரை மாற்றும் திட்டம் இல்லை என்று மல்லிகார்ஜுன கார்கே திட்டவட்டமாக தெரிவித்துவிட்டார்.
கலபுர்கியில் இதுகுறித்து செய்தியாளர்களிடம் நேற்று பேசிய மல்லிகார்ஜுன கார்கே, ‘முதல்வர் மாற்றம் குறித்த எந்த முடிவாக இருந்தாலும் மேலிடத் தலைவர்கள் அனைவரும் இணைந்துதான் எடுப்போம். இதுவரை முதல்வர் மாற்றம் குறித்து முடிவெடுக்க எந்த தேதியும் நிர்ணயிக்கப்படவில்லை. அப்படியிருக்கையில், மாற்றம் நடக்குமா இல்லையா என்று நான் எப்படி கூறமுடியும்? மேலிடத் தலைவர்கள் நாங்கள் இதுகுறித்து எங்களுக்குள் மிக விரிவாக விவாதித்துள்ளோம். மூத்த தலைவர்களிடமும் ஆலோசனை நடத்தியிருக்கிறோம்.

அதன் விளைவு என்னவென்பதை கருத்தில்கொண்டு, அதற்கேற்ப நடவடிக்கைகளை எடுக்கிறோம். ஆனால் இதற்கான காலக்கெடு எதுவும் இறுதி செய்யப்படவில்லை. அப்படி மாற்றம் செய்யப்பட்டால் நான் கண்டிப்பாக ஊடகத்திடம் தெரிவிப்பேன். தயவுசெய்து என் கருத்தை தவறாக புரிந்துகொள்ளாதீர்கள். எனது கருத்தை தவறாக சித்தரித்துவிடக்கூடாது என்பதற்காகத்தான் பெரும்பாலும் பொதுவெளியில் கருத்து கூறுவதை தவிர்க்கிறேன். என்ன முடிவெடுக்கப்பட்டாலும், அது மாநிலத்தின் நலனுக்கானதாகவே இருக்கும். கட்சி மேலிடம் என்ன முடிவெடுத்தாலும் அனைவரும் ஒத்துழைப்பு கொடுத்து நடக்க வேண்டும்’ என்றார்.