கொலை மிரட்டல் விடுத்த விசிக நிர்வாகி கைது

விருதுநகர், ஏப்.29: விருதுநகரில் மாஜி திமுக கவுன்சிலருக்கு கொலை மிரட்டல் விடுத்த விசிக நிர்வாகியை போலீசார் கைது செய்தனர். விருதுநகர் அம்பேத்கர் தெருவை சேர்ந்தவர் மாஜி நகராட்சி திமுக கவுன்சிலர் போஸ் (50). இவரது செல்போனுக்கு தொடர்பு கொண்டு, கம்மாபட்டி பகுதியை சேர்ந்த விசிக நகர செயலாளர் வெற்றிவேல்(36), ரூ.20 ஆயிரம் கேட்டுள்ளார்.

மேலும் பணத்தை கொடுக்காவிட்டால் கொலை செய்து விடுவதாக மிரட்டியதாக கூறப்படுகிறது. இந்த நிலையில் புதுத்தெரு மாதா கோவில் அருகே போஸிடம் பணம் கேட்டு மிரட்டிய போது, அங்கிருந்த பெண் ஒருவர் தட்டி கேட்டுள்ளார். அவரையும் வெற்றிவேல் தகாத வார்த்தைகளால் திட்டியதாக கூறப்படுகிறது. இது குறித்து போஸ் அளித்த புகாரின் பேரில், விசிக நகர செயலாளர் வெற்றிவேலை, கிழக்கு போலீசார் கைது செய்தனர்.