சென்னை: ஐபிஎல் தொடரில் சென்னை சேப்பாக்கம் சின்னசாமி ஸ்டேடியத்தில் இன்று இரவு 7.30 மணிக்கு நடைபெறும் 7வது லீக் போட்டியில் 5 முறை சாம்பியனான சென்னை சூப்பர் கிங்ஸ், பஞ்சாப் கிங்சுடன் மோதுகிறது. முதல் போட்டியில் ராஜஸ்தான் ராயல்சிடம் மோசமான தோல்வியை சந்தித்த சிஎஸ்கே இன்று சொந்த மண்ணில் வெற்றி கணக்கை தொடங்க வேண்டிய கட்டாயத்தில் உள்ளது. மூத்த அனுபவ வீரர் தோனி இல்லாத நிலையில் சஞ்சு சாம்சன், கேப்டன் ருதுராஜ் கெய்க்வாட் ,ஆயுஸ் மாத்ரே, மேத்யூ ஷார்ட், ஷிவம் துபே உள்ளிட்டோர் மீது பேட்டிங்கில் எதிர்பார்ப்பு உள்ளது. பவுலிங்கில் கலீல் அகமது, அன்ஷுல் கம்போஜ், கார்த்திக் சர்மா ஆகியோருடன் சுழலில் நூர் அகமது இடத்தை தக்க வைத்துக்கொள்வர். ராஜஸ்தானுக்கு எதிராக நூர் அகமது சொதப்பிய நிலையில் இன்று சாதிக்க வேண்டிய நெருக்கடியில் உள்ளார்.

மறுபுறம் கடந்த சீசனின் ரன்னரான பஞ்சாப் கிங்ஸ் அதே பார்மில் உள்ளது. பேட்டிங்கில் கூப்பர் கனோலி, பிரியான்ஷ் ஆர்யா, பிரப்சிம்ரன்சிங், கேப்டன் ஸ்ரேயாஸ், வதேரா, ஷஷாங் சிங், மார்கஸ் ஸ்டோனிஸ் என பெரிய பட்டாளமே உள்ளது. பவுலிங்கில் மார்கோ ஜான்சன், அர்ஷ்தீப் சிங், சேவியர் பார்லெட், வைஷாக், சுழலில் சாஹல் சென்னை அணிக்கு கடும் சவால் அளிப்பர். நடப்பு சீசனில் சென்னையில் நடைபெறும் முதல் போட்டிக்கான டிக்கெட் அனைத்து விற்று தீர்ந்து விட்டது. இதனால் ஸ்டேடியத்தில் உள்ள 30 ஆயிரம் இருக்கைகளும் நிரம்பி விடும். மஞ்சள் ஆர்மி ஆதரவுடன் சென்னை வெற்றிபெறுமா என்ற எதிர்பார்ப்பு உள்ளது.

இதுவரை நேருக்கு நேர்…
இதற்கு முன் இரு அணிகளும் 32 முறை நேருக்கு நேர் மோதி உள்ளன. இதில் தலா 16ல் வென்றுள்ளன. சேப்பாக்கத்தில் மோதிய 9 போட்டியில் 4ல் சிஎஸ்கே, 5ல் பஞ்சாப் வென்றுள்ளன. கடைசியாக பஞ்சாப்பிற்கு எதிராக இங்கு மோதிய 3 போட்டியிலும் சிஎஸ்கே தோல்வி அடைந்துள்ளது குறிப்பிடத்தக்கது.