நன்றி குங்குமம் டாக்டர்
சின்னத்திரையில் யாரடி நீ மோகினி தொடரில் வில்லியாக அறிமுகமாகி கயல் தொடரில் கதாநாயகியாக களமிறங்கி கணக்கிலடங்கா ரசிகர்களை தன் வசமாக்கி வைத்திருப்பவர் சைத்ரா ரெட்டி. சமீபத்தில் சிறந்த சின்னத்திரை கதாநாயகிக்கான தமிழக அரசின் மாநில விருதை இவர் பெற்றுள்ளார். சைத்ராவின் ஃபிட்னெஸ் ரகசியங்களை தெரிந்து கொள்வோம்.
வொர்க்கவுட்ஸ்: தினசரி ஒரு மணி நேரம் ஜிம் பயிற்சிகளுக்கு ஒதுக்கிவிடுவேன். அதேசமயம், சில நேரங்களில் சில மாதங்கள் கூட ஜிம்முக்கு பிரேக் எடுத்துக்கொள்வேன். உதாரணமாக ஒரு எட்டு மாதம் தொடர்ந்து ஜிம் போகிறேன் என்றால் ஒரு மூன்று மாதம் போகவில்லை என்றாலும், என் உடலில் பெரிய மாற்றம் தெரியாது. காரணம், உணவில் அதை பேலன்ஸ் செய்துவிடுவேன். எனது ஜிம் டிரைனர் சொல்வது என்னவென்றால், 80 சதவீதம் உணவு 20 சதவீதம் உடற்பயிற்சி இதை சரியாக செய்தாலே உடல் ஆரோக்கியமாக இருக்கும் என்பார். அதைத்தான் ஃப்லோ செய்கிறேன்.
வொர்க்கவுட்ஸ் என்று எடுத்துக் கொண்டால், முதலில் யோகாவுடன் எனது வொர்க்கவுட்ஸ் தொடங்கும். பின்னர், ஸ்ட்ரெச்சிங் பயிற்சிகள் ஸ்டேமினாவை அதிகரிக்கும் வகையில் பைலேட்ஸ் பயிற்சிகள், புஷ்- அப், புல் – அப், க்ரஞ்சஸ் மற்றும் ஸ்குவாட் பயிற்சிகளும் செய்வேன். இவைதான் எனது வொர்க்கவுட் ரகசியங்கள்.
டயட்: என்னை பொருத்தவரை, டயட்டில் எந்தவித கட்டுப்பாடுகளும் கிடையாது. அதே சமயம் பெரிய ஃபுட்டியும் கிடையாது. வெஜிடேரியன், நான்வெஜிடேரியன் என எல்லாமே சாப்பிடுவேன். எனக்கு மிகவும் பிடித்த உணவுகள் என்றால் மீன் உணவுகள் ரொம்ப பிடிக்கும். அதேசமயம், ஆரோக்கியமான உணவில் அதிகம் கவனம் செலுத்துவேன்.
பொதுவாக நமது உணவில் புரோட்டீன் அதிகமாகவும், கார்ப்ஸ் குறைவாகவும் இருந்தாலே நமது உடல் எடை கூடாது. அரிசி சாதத்தைப் பொருத்தவரை ஒருநாளைக்கு 150- 200 கிராம் வரைதான் எடுத்துக்கொள்ளவேண்டும். அது சப்பாத்தியாக இருந்தாலும் சரி. அதுபோன்று மைதா சேர்த்த உணவுகள் எதையும் நான் சாப்பிடுவதில்லை. சர்க்கரை சேர்த்த உணவுகளையும் சாப்பிட மாட்டேன்.
அந்தவகையில், எனது காலை உணவில் புரோட்டீன் அதிகமாக இருக்கும். உதாரணமாக, பச்சைப்பயறில் செய்யும் பெசரட் தோசை தேங்காய் சட்னி, வெயில் காலங்களில் வாரத்தில் மூன்று நாட்கள் பழையசாதம் பச்சைமிளகாயும் சாப்பிடுவேன். அதுபோன்று நான் தினசரி சாப்பிடும் உணவை அளந்து கணக்கிட்டுதான் சாப்பிடுவேன். அதுபோன்று வெளி உணவுகளையும் தற்போது தவிர்த்து விடுகிறேன். வீட்டு உணவுகளைதான் சாப்பிடுகிறேன். காய்கறிகள் நிறைய சேர்த்துக்குவேன். சாலட் வகைகள் சேர்த்துக் கொள்வேன்.
பழங்களும் சாப்பிடுவேன். இது தவிர, தினசரி நிறைய தண்ணீர் குடிப்பேன். பொதுவாக, ஒருநாளைக்கு தேவையான அளவு தண்ணீர் எடுத்துக்கொண்டாலே ஒருவரது உடல் ஆரோக்கியமாக இருக்கும். அதுபோன்று, இரவு உணவை எப்போதுமே சீக்கிரமாகச் சாப்பிட்டுவிடுவேன். அதுபோல எவ்வளவுதான் பிடித்த உணவாக இருந்தாலும், அளவோடுதான் சாப்பிடுவேன்.
பியூட்டி: பொதுவாக, ஒருவரின் சருமம் பளபளப்பாக இருந்தாலே தோற்றமும் அழகாக இருக்கும். எனவே, ஸ்கின்கேரில் நான் மிகவும் கவனம் செலுத்துவேன். அந்தவகையில், சரும பராமரிப்புக்காக எனது தினசரி காலை எழுந்ததும், ஃபேஷ் வாஷில் முகத்தை கழுவிவிட்டு, ஒரு ஃபேஸ் மாஸ்கை போட்டுக் கொள்வேன். பின்னர், கழுவிவிட்டு ரெட்டினால், மாய்சுரைஸர், சன்ஸ்கிரீன் எடுத்துக்கொள்வேன். பின்னர், தலைமுடிக்கு ஹேர் மாஸ்க், சீரம் போன்றவற்றை பயன்படுத்துகிறேன்.
இப்போது, எனது ஸ்கின்கேரில் எப்போதும், ஆன்டிஏஜிங் தயாரிப்புகளையும் பயன்படுத்துகிறேன். அதுபோன்று, மேக்கப் போடும்பொழுது முடிந்த வரை ஃபவுண்டேஷனை குறைந்த அளவே பயன்படுத்துவேன். ஏனென்றால் ஃபவுண்டேஷன் ஹெவி கவரேஜ் கொடுப்பதனால் சருமத்தின் துளைகளை அடைத்துக்கொள்ளும். அதனால் முடிந்த வரையில் ஃபவுண்டேஷனுக்கு பதில் கவரேஜுக்காக பிபி கிரீம் உபயோகிப்பேன்.
அதுபோல, ஷூட்டிங் இல்லாத சமயத்தில் மேக்கப்பை தவிர்த்துவிட்டு, மிகவும் சிம்பிளான லுக்கில்தான் வீட்டில் இருப்பேன். வெளியே சென்றாலும் மேக்கப்பில்லாமல் தான் செல்வேன். அந்த வகையில் என்னிடம் குறைந்த மேக்கப் அயிட்டங்கள்தான் வைத்திருக்கிறேன். அதனால், பத்து நிமிடத்தில் மேக்கப் முடித்து ஷூட்டுக்கு சென்றுவிடுவேன். பெரும்பாலும், நான் விரும்பி எடுத்துக் கொள்வது ஃபெர்ப்யூம்தான். அதுபோன்று, எவ்வளவு தான் ஷூட்டிங்கில் பிஸியாக இருந்தாலும் சரி, ஷூட்டிங் லேட் நைட் முடிந்தாலும் சரி, இரவு படுக்கச் செல்லும் முன்பு எனது மேக்கப்பை ரிமூவ் செய்துவிட்டுதான் குளித்துவிட்டுதான் தூங்குவேன். இவைதான் எனது பியூட்டி சீக்ரெட்ஸ்.
