சென்னை: திமுக கூட்டணியில் தேமுதிக இணைந்தது. 2016ல் மக்கள் நல கூட்டணி, 2019ல் பாஜக கூட்டணி, 2021ல் அமமுக கூட்டணி, 2024ல் அதிமுக கூட்டணியில் தேமுதிக இடம்பெற்றது. கடந்த 4 தேர்தல்களில் தேமுதிகவின் தொடர் தோல்விக்கு தவறான கூட்டணி முடிவே காரணம் என விமர்சனம் எழுந்தது. 4 தேர்தல்களில் தேமுதிகவினர் ஒருவர் கூட வெற்றி பெறாத நிலையில், வரும் தேர்தலில் சரியான கூட்டணி முடிவு எடுக்க கட்சியினர் வலியுறுத்தினர். திமுக கூட்டணியில் இணைய 50-க்கும் மேற்பட்ட தேமுதிக மாவட்ட செயலாளர்கள் விருப்பம் தெரிவித்தனர்.

வெற்றி வாய்ப்பு உள்ள கூட்டணி என்பதால் திமுக கூட்டணியில் இணைந்துள்ளதாக தேமுதிக நிர்வாகிகள் தெரிவித்தனர் இந்நிலையில் சென்னை அண்ணா அறிவாலயத்தில் முதலமைச்சர் மு.க.ஸ்டாலினுடன் பிரேமலதா சந்தித்து பேசினார். கட்சியின் எதிர்க்காலத்தை கருத்தில் கொண்டு பிரேமலதா திமுக கூட்டணியில் இணைந்தார். வாக்குறுதிப்படி மாநிலங்களவை சீட் தராத எடப்பாடிக்கு பாடம் புகட்ட திமுக கூட்டணியில் இணைய பிரேமலதா முடிவு என தகவல் வெளியாகியுள்ளது. தேமுதிகவை அதிமுக-பாஜக கூட்டணியில் கொண்டு வர பல கட்ட பேச்சு நடந்தபோதும் அக்கட்சி திமுக கூட்டணியில் இணைந்தது.

அதிமுகவினர் பேச்சு நடத்தி உடன்பாடு ஏற்படாத நிலையில் பாஜக தலைவர்கள் பேச்சு நடத்தியும் பலனில்லை. கடந்த தேர்தலில் 30 தொகுதிகளில் 5,000-10,000 வாக்கு வித்தியாசத்தில் திமுக கூட்டணி வெற்றி வாய்ப்பு இழந்தது. வரும் தேர்தலில் 200 தொகுதிகளை வெல்ல திமுக இலக்கு நிர்ணயித்துள்ளது. தேமுதிகவை கூட்டணியில் சேர்ப்பதன் மூலம் குறைந்த வாக்கு வித்தியாசத்தில் தோல்வி ஏற்படுவது தவிர்க்கப்படும். கணிசமான வாக்கு வங்கி வைத்துள்ள தேமுதிக இணைந்ததால் திமுக கூட்டணி மேலும் வலுவடைந்தது. 2005ல் தொடக்கப்பட்ட தேமுதிக முதல் முறையாக திமுக கூட்டணியில் இணைந்தது.

திமுக கூட்டணியில் தேமுதிக இணைந்ததால் அதிமுக-பாஜகவின் மெகா கூட்டணி முயற்சிக்கு பின்னடைவு ஏற்பட்டுள்ளது. கடந்த நாடாளுமன்ற தேர்தலில் அதிமுக கூட்டணியில் இருந்த ஒரே பெரிய கட்சி தேமுதிகதான்.