கொழும்பு: டி.20 உலக கோப்பை தொடரில் இலங்கை கொழும்பு மைதானத்தில் நேற்று நடந்த 22வது லீக் போட்டியில், அயர்லாந்து-ஓமன் அணிகள் மோதின. டாஸ் வென்ற ஓமன் அணி, பவுலிங்கை தேர்வு செய்தது. அயர்லாந்து அணியின் தொடக்கவீரர்களாக ரோஸ் அடெர்-டிம் டெக்டர் ஜோடி களமிறங்கினர். அடித்து ஆட முயன்ற டிம் டெக்டர் 5 ரன்னிலும், ரோஸ் அடெர் 14 ரன்னிலும் ஆட்டமிழந்து அதிர்ச்சியளித்தனர். அடுத்து களமிறங்கிய கேப்டன் லோர்கன் டக்கர் அதிரடி காட்டினார். இதனால் ரன் மளமளவென உயர்ந்தது. ஒருமுனையில் விக்கெட் விழுந்தாலும், டக்கர் கடைசி வரை ஆட்டமிழக்காமல் 94 ரன் (பவுண்டரி-10, சிக்ஸ்-4) விளாசினார்.

கேரத் டெலானி 56 ரன் குவித்து துணை நின்றார். 20 ஓவர் முடிவில் அயர்லாந்து 5 விக்கெட் இழப்பிற்கு 235 ரன் குவித்தது. ஓமன் தரப்பில் அகமது 3 விக்ெகட் வீழ்த்தினார். 236 ரன் என்ற இமாலய இலக்கை நோக்கி அடுத்து ஓமன் களமிறங்கியது. தொடக்க வீரரான கேப்டன் ஜதீந்தர் சிங் 7 ரன்னில் அவுட்டாகி அதிர்ச்சியளித்தார். மற்றொரு தொடக்க வீரர் அமீர் கலீம் 50 ரன் எடுத்து அவுட்டாகி வெளியேறினார். பிறகு அடுத்தடுத்து விக்கெட்டுகள் சரிய 18 ஓவர்களில் 139 ரன்னில் ஓமன் ஆல்அவுட் ஆனது. அயர்லாந்து தரப்பில் லிட்டில் 3 விக்கெட் வீழ்த்தினார். 96 ரன் வித்தியாசத்தில் அயர்லாந்து அபார வெற்றி பெற்றது. அந்த அணியின் கேப்டன் லோர்கன் டக்கர் ஆட்டநாயகன் விருதை வென்றார்.